Navalnyj-p arnaata ernermi timaa toqusut inaannut takuniaqqusaanngikkaa
![](/sites/default/files/styles/image_934x467/public/2024-02/20240216-163104-L-1920x1280we.jpg?itok=BYInBvAZ)
Ruslandimi illuatungiliuttut nuimanersaasa ilaat, Aleksej Navalnyj, parnaarussivimmiitsilluni qanittukkut toquvoq, arnaatalu Navalnyj-llu eqqartuussissuserisuisa Navalnyj-p timaa toqusut inaanniittoq illoqarfimi Salekhardimiittoq takuniaqqusaasimanngilaat.
Navalnyj sinnerlugu oqaaseqartartoq, Kira Yarmysh, inoqatinut attaveqaqatigiittarfikkut X-ikkut taama allappoq.
- Eqqartuussissuserisuisa ilaat inimit allaat ajanneqarluni anisitaavoq, Yarmysh ilaatigut allappoq.
Navalnyj-p timaa sumiinnersoq toqusut inaanni sulisut ilisimatitsissutiginianngikkaat, Yarmyship ilanngullugu allaaseraa.
Tassa Navalnyj-p timaa toqusut inaaniinnersoq aamma nalornisigineqarpoq.
Navalnyj Sibiriami parnaarussivimmi IK-3-mi toqusimasoq, Ruslandimi parnaarussiveqarnermi aqutsisut tallimanngormat nalunaarutigaat.
Navalnyj-p timaa toqusut inaannut illoqarfimmi Salekhardimiittumut nuunneqarsimasoq, ilaqutaasa atorfilittaasalu kingorna ilisimatinneqarput.
Navalnyj-p arnaa 69-inik ukiulik, Navalnyj-p eqqartuussissuserisui peqatigalugit kingorna Salekhardiliarpoq Navalnyj-p timaa takuniarniarlugu. Toqusulli inaannut apuukkamik matoqqavoq. Navalnyj-p timaa suli takusinnaanagulu tigusinnaasimanngilaat.