NATO gassimut ruujorit ilaanni maqisoortoqareersorlu Østersømi alapernaarsuinerulerniartoq
Østersømi gassimut ruujorit ilaanni maqisoortoqareersorlu Nunat killiit illersoqatigiiffiata NATO-p Østersømi alapernaarsuinerulernissani aalajangerpaa.
Nutaarsiassaqartitsivik Reuters taama allaaserisaqarpoq.
Østersømi alapernaarsuinerulernissaq NATO-p aalajangerpaa. NATO taama allaaserisaqarpoq.
Timmisartut amerlanerusut, timmisartuaqqallu ungasianit aqunneqarsinnaasut dronet, umiarsuillu qaartartuiaasinnaasut amerlanerusut atorlugit alapernaarsuinerusoqalissasoq nalunaarutigineqarpoq.
Finlandip Estlandillu akornanni gassimut ruujorit ilaanni aseruatitertoqarsimanera sapaatit akunnerata siuliani nalunaarutigineqareersorlu taamaaliortoqarpoq.
Finlandip Estlandillu akornanni gassimut ruujorimi Baltic Connectorimi naqitsineq oktobarip ulluisa arfineq-pinngajuanni appariasaarpoq. Ruujorini aseruatitertoqarsimasoq ullut marluk qaangiummata nalunaarutigineqarpoq,
Ruujorit aseruatiternerannut suut pissutaanersut suli ilisimaneqanngilaq.
Gassimut ruujorimi Baltic Connectorimi aseruatitertoqarnerata saniatigut attaveqaatinut Finlandip Estlandillu akornanni kabelini aamma aseruatitertoqarsimasoq paasineqarpoq.
Gassimut ruujorit aseruatiternerisa nalaanni attaveqaatitigut kabelit aamma aseruatitersimagunartut oqaatigineqarpoq.
Gassimut ruujorerujussuaq Nord Stream 2, Bornholmip eqqaaniittoq, siorna qaartinneqarmalli, nunap atortulersugaaneranut pingaarutilinnik soorlu gassinut ruujorinik, attaveqaatinullu kabelinik Østersøp naqqaniittunik nakkutiginnittoqarnerulerpoq.
Nord Stream 1-imik 2-millu qaartitsinerit Danmarkimit, Sverigemit Tysklandimiillu misissuiffigineqaleruttorput.