Russit sakkutuuisa umiarsuaataat gassinut ruujorinik qaartitsiffiit nalaanniissimasut

Gassinut ruujorit Nord Stream 1-ip 2-llu qaartinneqarnissaasa tungaannut russit sakkutuuisa umiarsuaataat, qaartitsisoqarnissaanut qaammatialunnguit ullulualunnguillu sioqqullugit qaartitsiffiit nalaanniipput.

DR, Norgemi NRK, Sverigemi SVT, Finlandimilu Yle suleqatigalugit taama allaaserisaqarpoq. Taakku russit sakkutuuisa umiarsuaasa raatiukkut attaveqaqatigiittarnerannut paasissutissat pissarsiarisimavaat.

Umiarsuit ruujorit qaartinneqartut eqqaanniissimapput, immallu iluani iliuuseqarsinnaassuseqarsimallutik.

Umiarsuit qaartitsiffiit nalaanni akunnerpaaluit sioqqullugit, allaallumi ulloq unnuarlu sioqqullugit, qaartitsiffiit nalaanniissimasut, DR allappoq.

Umiarsuit ilaat qaartitsiffiit nalaanni ullut tallimat sioqqullugit uninngasimavoq.

Russit umiarsuaataat ikinnerpaamik pingasut angallaffii pillugit paasissutissat tusagassiorfiit pissarsiarisinnaasimavaat.

Jens Wenzel Kristoffersen, sakkutuut imarsiortut naalagaasa ilaat, Københavnillu Universitetia sinnerlugu illersornissamut tunngasuni naliliisartoq, DR-imut oqarpoq immap iluani arlaatigut iliuuseqartoqarsimaneranik takussutissaqartoq.

- Umiarsuit ataatsikkut sumiiffimmiittut takutippaat immap naqqani arlaatigut iliuuseqartoqartoq, qaartitsinernullu taakku attuumaassuteqarsinnaasut, naak tamanna sukumiinerusumik oqaatigisinnaanngikkaluaripput, Jens Wenzel Kristoffersen oqarpoq.

DR-ip paasisai naapertorlugit umiarsuit taakku gassinut ruujorit nalaanni siorna juunimi septembarimilu najuussimapput.

Nord Stream 1-imi 2-milu gassimik aniasoqarnera siorna septembarimi nalunaarsorneqarpoq. Gassinut ruujorit taakku Østersømi immap naqqaniipput.

Nunat arlallit oqartussaasuisa - Danmark taakkununnga ilaalluni oqaatigaat - gassinut ruujorit piaaraluni ajoquserneqarsimasut.

Kina imaluunniit kikkut taamaaliortuusimanersut suli ilisimaneqanngilaq.

Russit umiarsuaasa gassinut ruujorit nalaanniinnerannut paasissutissat DR-ip Ruslandip Danmarkimi aallartitaqarfianut saqqummiussimavai. Aallartitaqarfik DR-ip saaffiginnissutaanut akissuteqarsimanngilaq.

Ruslandip Sverigemi, Norgemi Finlandimilu aallartitaqarfii umiarsuaasa angallannerat pillugu apersorneqarnissamut aamma itigartitsisimapput.