NATO Londonimi ukiunik 70-inngortorsiortoq
Trumpillu Frankrigip præsidentia Emmanuel Macron ingerlaannaq saassutaraa, Macronimmi NATO sapaatip-akunnerata siuliani apeqquserpaa, NATO-mi pilersaarusiorluakkamik aqunneqannginnerarmagu.
Macronip oqaasii taqassinartutut Trumpip nalilerpai.
AAMMA ATUARUK Pompeo Berlinimi: USA-p Nato Ruslandimut Kinamullu nukittunerutikkusuppaa
Frankrigili NATO-mi piffissami kingullermi aalassatsitsisutuaanngilaq.
Nunammi NATO-mi ilaasortat 29-t akornanni Tyrkia sakkussianik Ruslandimit pisinermigut NATO-mi pakatsisitsivoq, sakkussiallu taakku ilaatigut atorlugit kurderit Syriap avannaaniittut saassullugit.
AAMMA ATUARUK Syriap sakkutuuisa Kurderit Tyrkiap saassussiffigisaaniittut ornikkaat
Tuluit naalakkersuisuisa NATO-p Londonimi ataatsimiinnera aaqqissuussaraat, NATO-llu ukiunik 70-iliinerata nuannersumik malunnartinneqarnissaa pillugu, dronning Elisabeth qaaqqusisoralugu kunngikkormiut illussaarsuanni Buckingham Palacemi ilassinninnissamut qaaqqusipput.
Buckingham Palacemi ilassinnittoqareerpat, nunat naalakkersuinikkut siuttui tuluit ministeriunerunerata Boris Johsonip Downing Street 10-mi najugaqarfianukassapput.
Politikkikkut oqaloqatigiinnerit pisortatigoortumik taava aqagu aallartissapput, illersornissamik avataarsuani suliat, NATO-mullu ilaasortaanermi akiliutit annertussusissaat, Kinallu sakkutuulersornikkut nunarsuup sinneranut sunniutai oqaluuserineqartunut ilaassallutik.
