Syriap sakkutuuisa Kurderit Tyrkiap saassussiffigisaaniittut ornikkaat
Syriap naalagaaffiata sakkutuui illoqarfimmut Manbijimut Syriap avannarpasinnerusortaaniittumut Kurderinillu tapersersorteqarlutik sakkutuutut pissusilersortunit nakkutigineqartumut ullumikkut marlunngornermi apuupput.
Syriap naalagaaffiata tv-qarfia taama ilisimatitsivoq.
Taakkua kurderit Tyrkiap maannamut sapaatit akunnerata ataatsinngungajalersumik saassussiffigisaaniittut ikiussavaat. Sakkutuut piareersimasut kurderinik aqutsisullit Syriap avannarpasinnerusortaata annerpaartaani ingammillu avannaata kangisissuani nakkutiginnittupilussuit saassunniarpaat.
AAMMA ATUARUK 70.000-t Syriap killeqarfiani illoqarfinnit qimaasut
Tyrkiap Syriami nunap ilaa Tyrkiap Syriallu killeqarfiisa eqqaanniittoq 30 kilometerisut silissusilinngorlugu isumannaallisarniarpaa. Tyrkia taamaaliornermigut Syriamit qimarngusut 3,6 millioniusut ilarpassuisa nunaminnut uternissaannik isumaginiarpai.
Tamatumalu saniatigut Tyrkiap sakkutuui sakkutuutut pissusilersortunut YPG-inut saassussinissaminnut pilersaarput.
Tyrkiap YPG-it PKK-nut, EU-mit peqqarniisaarniatut isigineqartunut, attuumassuteqarlutik peqqarniisaarniatut Tyrkiamilu pikititsisartutut isigai.
AAMMA ATUARUK Tyrkiamiut 100.000-it saassusisoqarmat qimaasut
Tyrkiap saassussinerannut atatillugu inuit angerlarsimaffimminniit qimarngusariaqarsimasut maannamut 275.000-nit amerlanerupput. Kurdistanimi oqartussaasut taama ilisimatitsissuteqarsimasut nutaarsiassaqartitsivimmit Reutersimit allaaserineqarpoq. Meeqqat 70.000-t qimarngusut ilagaat.
Tyrkiamiut saassussinerat Syriamiut imminnut sorsunneranni piffissami kingullermi pisut ilagaat.
Pikititsisut Syriallu naalakkersuisui Syriap præsidentianik Bashar al-Assadimik siuttullit akiuunnerisa kingunerisaannik 2011-imi sorsuutilerput. Suliffissaaleqisorpassuaqarnera, peqquserlunnerit politikkikkullu killilersuisoqarnera sorsuunnerannut pissutaasut ilagaat.
Sorsuunnerisa aallartinneraniit maannamut ukiut arfineq-pingasut qaangiupput, tamannalu inuit 370.000-t inuunerannik naleqarpoq. Taakkunani 112.000-t innuttaasuupput.
/ritzau/AFP