70.000-t Syriap killeqarfiani illoqarfinnit qimaasut

Inuit sakkutuujunngitsut arfineq-marluk tyrkiamiut Syriap avannaata kangisissuanut saassussineranni toqutaapput. Nakkutilliisut taama paasissutissiipput.

- Toqutaasuni sisamat Tell Abyadimi timmisartumit saassussisoqarnerani toqutaapput, sinnerilu pingasut illoqarfiup killeqarfiata eqqaani isertorluni eqqaassisumit toqutaallutik, Syriami inuit pisinnaatitaaffii pillugit alaatsinaattut nalunaaruteqarput.

Sakkutuujunngitsut aqqanillit sakkutuullu 30-t toqutaasimasut BBC-p allaaseraa.

Sakkutooq tyrkiamiu Syriap avannarpasissuani saassussinermi toqutaavoq. Tyrkiamiup ataatsip toqutaanerata saniatigut tyrkiamiut sakkutuut pingasut kurderit sakkutuuinit ikilerneqarput.

Sorsuffimmi 120 kilometerinik isorartutigisumi aporaattoqartartoq, Syriami inuit pisinnaatitaaffii pillugit alaatsinaattut Syriami sumiiffimmi tamanit tusarfeqartartut oqaatigaat.

AAMMA ATUARUK FN-ip isumannaallisaanermut siunnersuisoqatigiivisa europamiortaat tyrkiamiut saassussinerat assuaraat

Tuusintilikkuutaat qimaasut

Tyrkiamiut qaartartumeerimmata meeqqat taakkulu ilaqutaat tusindilikkuutaat qimaasut, Meeqqat pillugit suliniaqatigiiffimmit Unicefimit oqarput.
Inuit 70.000-it killeqarfimmi illoqarfimmi Tell Abiadimi Ras Al Ainimilu angerlarsimaffimminnit Syriami aaqqiagiinngissuteqartoqarnerata kingunerisaanik qimaareersut, Unicefip oqaatigaa.

Illuatungeriit akerleriittut atuarfinnik tiguaasareertut Unicefip Danmarkimi attaveqaqatigiinnermut pisortaata, Line Grove Hermansenip oqaatigaa.

- Akerleriit meeqqanik illersuiuaannartariaqaraluarput. Taakku sorsunnermut akisussaanngikkaluarlutik naalliunnerpaapput, Line Grove Hermansen oqarpoq.

Unicef aporaarfimmiippoq, aallaqqaasiutigalugulu meeqqanut ilaqutaannullu 45.000-inut qaammammi ataatsimi nerisassaqartitsivoq, imissaqartitsilluni nakorsaatissaqartitsillunilu.

Tyrkia Syriap avannarpasissuata ilaanut pingasunngormat saassussivoq. Syriap avannarpasissuata ilaa kurderit eqimattaannit, YPC-mit nakkutigisaavoq. Kurderit Islamisk Statip akiorniarneranut USA-mik sivisuumik suleqateqarput.

AAMMA ATUARUK Tyrkiamiut sakkutuui Syriamut isaasut

Tyrkiamiulli naalakkersuisui akerlianik isumaqarput, kurderit aarlerinartuusoralugit. Eqimattat taakku Kurderit sulisartut partiiannut PKK-mut ilaasutut isigineqarpoq.

Inuit 109-t Tyrkia Syriap avannarpasissuani pingasunngornermat saassussisalermalli toqutaasimasut tyrkiamiut præsidentiata, Recep Tayyip Erdoganip sisamanngornermi oqaatigaa.

Tyrkiamiut præsidentiata toqutaasut 109-t ”peqqarniisaarniatut” taagorpai.

EU-mi nunat, USA, Iran, Egypten Saudi-Arabialu tyrkiamiut saassussineranut isumaqataanngillat.