FN-ip isumannaallisaanermut siunnersuisoqatigiivisa europamiortaat tyrkiamiut saassussinerat assuaraat

Taakku Naalagaaffiit Peqatigiit isumannaallisaanermut siunnersuisoqatigiivini ilaasortat tallimaallutik ataatsimoorussamik nalunaarutiminni Tyrkiap sakkutuuisa Syriami saassussinerminnik unititseqqullugit inappaat.

- Tyrkiamiut sakkutuuisa Syriap avannaata kangiani saassussinerat ernummatigisorujussuuarput, Frankrig, Tyskland, Tuluit Nunaat, Belgia Polenilu sinnerlugit siunnersuisoqatigiinni ilaasortat nalunaarutiminni allapput.

Tyrkiamiut sakkutuuisa Syriap killeqarfia pingasunngormat qaangeriarlugu Syriap avannaata kangianut isaapput.

Taamaattumik Europami nunat taakku tallimaasut Naalagaaffiit Peqatigiit isumannaallisaanermut siunnersuisoqatigiivisa pisoq anigorneqarniasammat matoqqasumik ataatsimiinnissaannut ippassaq aggersaapput.

- Tyrkiamiut sakkutuui illuinnarsiorlutik saassussinerminnik unitsitseqqullugit inappavut, isumaqaratta saassussinerat Tyrkiap isumannaallisaanikkut eqqasuuteqarunnaarnissaannut iluaqutaanavianngitsoq, europamiut nalunaarumminni taama aamma allapput.

AAMMA ATUARUK Tyrkiamiut sakkutuui Syriamut isaasut

Siunnnersuisoqatigiinni ilaasortat tamarmik ataatsimoorussamik nalunaaruteqarnissaminnut isumaqatigiissinnaasimanngillat.

Rusland nalunaarummut akerliusut ilagaat, inuullu kinaassutsiminik isertuussisup Rusland nalunaarummi naatsukullaannarmik ersarinngitsumillu oqaasertaliornermut ilanngukkusussimanerarpaa.

Kinaassutsimik isertuussisup aamma oqaatigaa, USA-p kingusinnerusukkut ataatsimoorussamik nalunaaruteqaqataanissi isumaliutigigaa.

USA-p FN-imi aallartitaata Kelly Craftip ataatsimiittoqareersoq USA-mi naalakkersuisut tyrkiamiut saassussinerannut tapersiinnginnerarpai.

Tyrkiallu saassussineranut tunngatillugu qanoq kinguteqartitsiumaarnerminik toqqaannartumik oqanngilaq, taamaattorli tyrkiamiut sakkutuuisa saassussineranut assuarinnigani.

/Ritzau/