NATO atomimik sakkussiarpaalunnik upalungaaqquteqalersaartoq
Nunat killiit illersoqatigiiffiata NATO-p atomimik sakkussiat arlallit peqqumaasivimmiit saqqummerniarpaat atorneqarnissaannullu piareersarniarlugit.
NATO-p qullersaa Jens Stoltenberg taama nalunaartoq, apersuisut tuluit atuagassiaanni The Telegraphimi tusagassiortut ullumi ataasinngornermi taama allaaserinnipput.
Kinap Ruslandillu nunanut killernut sioorasaanerinerulernerat piareersalernermut peqqutaasoq ilanngullugu allaaseraat.
- Atomimik sakkussiat qanoq amerlatigisut piareersarneqassanersut iserfiginianngilara, sakkussiallu suut peqqumaasivimmiitinneqassanersut oqaatiginiarnagu, kisianni eqqartoqatigiissutigisariaqarmata taakkorpiaat sammivagut, Stoltenberg nassuiaavoq.
Aviisimullu ima nangippoq: - Illersoqatigiiuvugut atomimik sakkussiaatillit, tamannalu taama nalunaarnitsigut ammasumik oqaluttuaraarput. NATO-mi anguniakkat pingaarnersarigaluarpaat nunarsuaq tassaassasoq atomimik sakkussiaqarfiunngitsoq.
Stoltenbergip aviisimut taama oqarnera sapaatit akunnerata siuliani nalunaarutaanut assinguvoq.
NATO-p qullersaa umittoormiuusoq nalinginnaanngitsumik nalunaaruteqarnermigut oqaatigaa, NATO atomimik sakkussianik atuinissamut piareersimasoq.
