Rusland: Nunat Killiit iliuusaat nunat atomitalimmik qaartartuutillit sorsulernerannik kinguneqarsinnaavoq
Nunat Killiit iliuusaat Ruslandimullu akerliuneruleriartornerat pissutaallutik nunat atomitalimmik qaartartuutillit sorsulernissaat aarlerinaateqarpoq.
Ruslandimi tusagassiorfiit arlallit allaaserisaat naapertorlugit, Ruslandip illersornissamut ministeria Sergej Sjojgu ataasinngornermi taama oqarpoq. Sjojgu sakkutooqarneq pillugu aallartitanut ataatsimiinnermut atatillugu Kinamiippoq.
Nutaarsiassaqartitsivik Reuters taama allappoq.
Sjojgu oqarpoq, Nunanuku Killiinngooq, Nunat Killiit illersoqatigiiffiat Nato taakkununnga ilaatillugu, Ruslandimik akerleriinnermik annertusaasuusut. Tamannalu sakkortuumik kinguneqarsinnaasoq, taanna oqarpoq.
- Nunat Killiit Ruslandimut akerliliinerminnik annertusaanerisa nunat atomitalinnik qaartartuutillit sakkutooqarnikkut aporaannissaannut aarlerinaateqalertippaat, nutaarsiassaqartitsiviup Tassip allaaserisaa naapertorlugu Sjojgu oqarpoq.
Rusland Krimmimik ukiut qulingajaat matuma siorna tiguaareersoq, Nunat Killiit Ruslandillu akornanni pissutsit ukiuni kingullerni qulini ajorneruleriartorput. Pissutsit suli ajornerulerput, Rusland Ukraine siorna saassummagu.
Nunat Killiit amerlasuut Ruslandip saassussineranut akissuteqarlutik aningaasaqarnikkut pillaatitut iliuuseqarmata, pissutsit ajorneruleriartuinnarput.
