Narsamut qinnuteqarfissaq sivitsuallanneqarpoq

Inuussutissarsiutinik nutaanik nunap immikkoortuani pilersitsiniartunik, pilersitsisunik, taava aamma atorfilittanik, ataqatigiissumik suliaqartussamut atorfik, Kujataani Inuussutissarsiutitigut ineriartortitsineq siunertaralugu Narsap, Qaqortup Nanortaliillu Kommuniisa ukioq manna pilersippaat.

Sulili inuttalerneqanngilaq. Inuussutissarsiorneq pillugu Narsarsuarmi ukioq manna isumasioqatigiittoqareersoq, Kalaallit Nunaanni Inuussutissarsiornermi Takornariaqarnermilu Siunnersuisoqatigiit, GTE-p, inuttassarsiuineq isumagilerpaat, maannamulli qinnuteqartoq ataasinnaasimasoq, GTE-mi Ineriartortitsinermi pisortaq Hans Peter Poulsen oqarpoq.

Nanortalik, Qaqortoq Narsarlu suleqatigilluinnaqqissaarlugit inuussutissarsiornermi pilersaarusiornerup ingerlanniarneqarnissaa atorfinittussap suliarisussaavaa, tassa imaappoq, suliffissaq taanna pissanganartuuvoq, pissutigalugu, politikerit, atorfillit, namminersortut aamma aallartitsiniartut tamaasa suleqatigalugit ineriartortitsineq ingerlassammat.

Imaasimasinnaava atorfiup Narsami inissisimanera pissutigalugu qinnuteqartut taama ikitsigisimasut?

- Taamaalluarsinnaavoq, kisianni aamma illuatungaagut tunngavissaqanngilagut taama oqassalluta. Tusaamasavut malillugit Kujataani atorfinitsitsiniarnerit assigiinngitsut ajornakusoortarpunngooq. Tusatsiakkat malillugit.

Kisianni, tunngaviatigut, una atorfik piffimmut ataatsimut mattusimasuunnginnami. Una suliassaq tigugaanni, taava angalangaatsiarneq Kujataani ingerlanneqarsinnaasoq, tamaammat atorfiup sumiiffimmi aalajangersimasumik aallaaveqarnissaa, soorlu akornutaavallaassanngikkaluartoq, Hans Peter Poulsen Kalaallit Nunaanni Inuussutissarsiornermi Takornariaqarnermilu Siunnersuisoqatigiinni ineriartortitsinermi pisortaq oqarpoq. Qinnuteqarfissaq ullumimiit sapaatip-akunneranik sivitsorneqarpoq, atorfinittussallu kalaallisut oqalussinnaanissaa soqutigineqartoq oqaatigineqarpoq.