Mette Frederiksen aamma Jens-Frederik Nielsen: Spiralilersuinermut tunngasoq aallarniissutaannaavoq

Danskit ministeriunerat, Mette Frederiksen Naalakkersuisullu siulittaasuat Jens-Frederik Nielsen spiralilersuisoqarneranut atatillugu pisortatigoortumik ullumi utoqqatsissuteqartoqarnerani naapikkunik misigissutsit assigiinngitsuussasut, Mette Frederiksenip KNR-imut pingasunngornermi ullaakkut oqaatigaa.

- Kalaallit Nunaata Danmarkillu oqaluttuarisaanerat qanimut atassuteqatigiipput, oqaluttuarisaanermi pisimasorpassuupput, ilaallu nuanninngitsuullutik. Ullumikkut suleqatigiillualernissamut pisimasut nuanninngitsut misissuiffigisinnaanissaat tunngavissaasoraara. Pisimasullu maanna saqqummersittalerpagut.

Ullumikkut utoqqatserneq spiralilersuisoqarsimaneranik suliamik matusiniarnerua?

- Pisimasunik matusinissamut iliuuseqanngilanga aamma ullumikkut. Mumingapajaanilli oqaluttuarisaanitsinniittunik ammaassiniarlunga suliaqarpunga, Mette Frederiksen oqarpoq.

Jens-Frederik Nielsenip spiralilersuineq pillugu suliaqarneq nunasiaataanerup nalaani pisimasut taarnersaannik taavaa, ullumikkullu utoqqatserneq Danmarkip nunattalu akornanni oqaluttuarisaanermi pisimasunik allanik ammaasseqataassasoq erseqqissaatigaa.

Illuatungiliuttut inuannik nungusaanertut taavaat, arnat suliami matumani eqqugaasimasorpassuit aamma taama taavaat. Illit qanoq taaviuk?

- Siullermik pisimasut ajorluinnartut pineqartut oqaatigisinnaavara. Nunasiaataanerup nalaani pisimasuni taarnerpaatut aamma taavara. Misissuinerit ilaat naammassipput, qulaajaanernilli allanik inuit pisinnaatitaaffiinut tunngasut allallu aamma suliarineqarput, taanna KNR-imut oqarpoq.

Tassa utoqqatserneq nunatta Danmarkillu akornanni pisimasunik nuanninngitsunik oqaluttuarisaanermik suliaqarnermut alloriarnertut isigineqassaaq.

- Oqaluttuarisaanermik siammasissumik qulaajaanermik aallartitsinissaq aalajangerparput. Meeqqat misileraatigineqarsimasut kisiisa ukkatarinngilagut, naak pingaaruteqaraluartoq. Aamma naak pingaaruteqaraluartoq spiralilersuineq kisiat ukkatarinngilarput, pissutigalugu ataatsimut oqaluttuarisaanitsinni kukkusumik iliuuserineqarsimasunik allanik aamma peqassammat, Mette Frederiksen oqarpoq.

Arnanut kisimi tunngassuteqartoq

Utoqqatsissuteqarneq amerikamiut sunniiniarnerannik saqqummiussinerup nalaani pivoq. Mette Frederiksenilli taakku marluk imminnut attuumassuteqannginnerarpai.

Taava Danmarkip avataanit qanoq isigineqarneranut tunnganngilaq? 

- Danmarkip qanoq isigineqarneranut tunnganngilluinnarpoq. Arnanut spiralilersuisoqarnermi eqqugaasimasunut tunngavoq, Danmarkimuunngitsoq. Taamaallaat danskit akisussaaffiannut.

Ministeriunerup utoqqatsissuteqarneq Danmarkip kukkusumik iliuuseqarsimaneranik akisussaaffimmik tigusinermut takussutissaasinnaassasoq neriuutigaa.

- Niviarsiaqqat spiralilersuisoqarnera pisuussutiginngilaat. Ataatsimullu oqaluttuarisaanitsinnik misissuerusussinnaanitsinni danskillu tungaanniit akisussaaffimmik tigusinerput kalaallit danskillu ataatsimoorneranni nutaaliaanerusumi ataqqinninnermik naligiinnermillu kissaateqarnitsinnut tapersiisinnaassasoq neriuutaavoq.

Jens-Frederik Nielsenip ullumikkut utoqqatserneq ataatsimut oqaluttuarisaanitsinni alloriarnermi pingaaruteqartoq aamma erseqqissaatigaa.

- Ullumikkut alloriarneq ikip pilersinneqarsimasup ilaanut mamisaataasinnaassasoq uannut pingaarnerpaavoq. Tamanna uannut pingaaruteqarnerpaavoq. Utoqqatserneq pissutsinik aaqqiisinnaanngitsoq nalunngilara, kisianni alloriarnertut isigaara.

Mette Frederiksenip Jens-Frederik Nielsen saammaasseqatigiinnissamut aningaasaateqarfimmik pilersitsisoqarnissaa pillugu oqaloqatiginiarlugu ullumikkut utoqqatsertoqarnissaa sioqqullugu oqaatigaa.

Oqaloqatigiinnissaq tamanna qilanaarutigaa, tamannali suliap ingerlaneranut kinguarsaataassanngilaq.

- Aningaasaateqarfiup sivitsorsaataananilu kinguarsaataannginnissaa pingaartipparput. Arnat eqqugaasimasut taarsiiffigineqarnissaat siunertaassaaq. Sukkasuumillu suliarineqarnissaa suleqataaffigerusupparput, Jens-Frederik Nielsen oqarpoq.