Ministeriuneq Mette Frederiksen (S) nunatsinnut marlunngornermi tikippoq, spiralilersuisimanermut tunngatillugu pingasunngornermi pisortatigoortumik utoqqatsissalluni.

Tamanna ministeriunerup Facebookimi allaaseraa.

- Naak ilungersunartumik peqquteqaraluartoq, uterfigalugu nuannertuaannarpoq.

- Spiralilersuisimanermi arnanut eqqugaasunut pisortatigoortumik utoqqatserneq aqagu malunnartissavarput. Tamanna ataatsimut oqaluttuarisaanitsinni kapitali taartup kingorna nalunaaqutsiineruvoq pingaarutilik, Mette Frederiksen allappoq.

Ministeriuneq Nuummi Katuami pingasunngornermi nalunaaqutaq 14.00 utoqqatsissaaq.

Frederiksen kalaallit arnartaannut taamanilu niviarsiaqqanut aaqqissuussamik immikkoortitaasunut aggustip 27-ani utoqqatsereernikuuvoq.

Suliaq spiralilersuisimanermut tunngasoq tassaavoq kalaallit arnartai niviarsiaqqallu 1960-ikkunni 70-ikkunnilu naartunaveersaatinik spiralilersugaasimanerat.

Danmarkip 1992 tikillugu Nunatsinni peqqinnissaqarfimmut akisussaanerata nalaani tamanna pivoq. 

Piffissanngortoq

Aammattaaq naalakkersuisut siulittaasuat, Jens-Frederik Nielsen, sulianut assingusunut nunatta peqqinnissaqarfimmut akisussaaffeqalereernerata kingorna pisimasunut aggustip 27-ani utoqqatserpoq. 

Utoqqatsereernermi kingorna Facebookimi allappoq "Danmark pisortatigoortumik utoqqatsernera kiisami pisoq pissusissamisuuinnarpoq".

- Eqqugaasimasut sivisuallaamik nipangiutiinnarneqarnikuusimanerat maanna qaqilerneqarpoq. Utoqqatserneq aatsaat pinera kingusippoq - kingusippallaarpoq akuersaaruminaallunilu, Jens-Frederik Nielsen allappoq.

Danskit naalakkersuisui saammaasseqatigiinissamut aningaasaateqarfimmik pilersitserusullutik, ataasinngornermi sapaatip akunnera matumani nalunaarput.

Arnanut spiralilersuisimanermut tunngatillugu eqqugaasunut kalallinullu allanut kalaaliunertik pillugu sumiginnagaasimasunik aaqqissuussaasumillu immikkoortitaasimasunut immikkut taarsiiviginninnissaq aningaasaateqarfiup siunertarigaa oqaatigineqarpoq. 

/ritzau/