Alaskap senatorata Trumpimik isumaqatiginninnginnerup nalaani nunarput tikeraaleraa
Alaskami senatori republikanerineersoq, Lisa Murkowski, Nuummut sapaatip akunnera matumani tikissaaq.
Attaveqarnermut sulisui KNR-imut taama nalunaarput.
Ikinngutini nalunngisanilu sivisuumik takusimanngisani, angalalluni ataatsimiigiareernermi kingorna uterniarnermini, taakku alakkarnissaannut periarfissaqalernini iluatsillugu nunatsinnut aqqusaalersoq, taakkunannga aamma oqaatigineqarpoq.
Taamaattumik Donald Trumpimiit aallartitaanngilaq USA-luunniit naalagaaffittut sinnerlugu tikeraarnani.
Aaja Chemnitz (IA) sisamanngornermi naapissavaa. Tamanna folketingimi politikerip uppernarsarpaa.
- Aqagu naapissavara, uanga Arctic Parliamentarians-imi siulittaasuuvunga tassanilu taanna siulittaasup tulliatut inissisimalluni. Ukiut qulit sinnerlugit nalunngisariinnikuuvugut politikkimilu suleqatigiittarluta.
Tuniniagaanngilaq
Lisa Murkowski Aaja Chemnitzillu januaarimi ataatsimut nalunaaruteqarput, tassanilu USA-p præsidentiata Kalaallit Nunaannik tiguaaniarnera isornartorsiorpaat.
Kalaallit Nunaata tuniniarneqannginneranik oqariartuut matumani uteqqinneqarpoq:
- Soorunami niuertoq præsidentinngorsimasoq soqutiginnissagaluarpoq, Kalaallit Nunaalli tuniniarneqanngilaq. Apeqqutigineqartoq naalakkersuisunit erseqqarissumik akineqareerpoq.
Naak marluullutik parteeqatigiikkaluarlutik Lisa Murkowski præsident Donald Trumpip oqaaserisartagaanut akerliliisartutut USA-mi ilisimaneqarpoq.
Senatori politikkimut tunngatillugu senatimi kiserliortutut misigaluni, New York Times-imut junimi oqarpoq, kiisalu:
- Qinersinerni arlaannaanni Trumpi qinernikuungilara. Kisianni taanna tassa præsidenteraarput. Isumaqarpunga inuit partiip siunertaanut malinneqqissaartuunngitsut sinaaniinnatillu qiterlermiittut pisariaqartinneqartut. Kisianni tassaniinneq massakkorpiaq kiserliornartuuvoq.
Naak præsidentilu isumaqatigiittuaannanngikkaluarlutik attaveqaqatigiilluarnertik, apersorneqarnermini aamma oqaatigaa.
- Oqaloqatigeqqaarakku oqarasuaatikkut oqaluuppara. Oqaloqatigiilluarpugut aamma tunniusserusoqaaq. Oqarfigaara Alaskamut ajunngitsuliorusullunga, taassumalu nunatsinnut ajunngitsuliornissaq kissaatigigaa. Taamaattumik suleqatigiissinnaassaqqaarpugut.
