Assit Narsami ivigaasaaqqanik arsaattarfik atoqqaartinneqartoq

Narsami silagissorsuugaa inuuttaasut ammaanersiornermut peqataajartorlutik takkupput. Arsaattarfittaami arsarluni ajugaanniuttoqarpoq taavalu aamma oqalugiartoqarluni.

Kommune Kujallermi borgmesteri Kiista P. Isaksen arsaattarfimmik ammaasuuvoq, nuannaarutigaalu Narsaq ivigaasaaqqanik arsaattarfittaarmat:

- Narsamut innuttaasunullu ulloq manna nalliuttorsiorfiuvoq Kommune Kujalliup oqaluttuarisaanerani pingaaruteqarluinnartoq, tassami kommunalbestyrelsimit anguniagarput, Kommune Kujalleq najugaqarfigissallugu nuannertuussasoq aammalu innuttaasuminut periarfissarissaartitsissasoq ullumi annertuumik timitalerparput,.

Kommune Kujallermi borgmesteri taama oqarpoq, nangillunilu:

- Narsamilu arsaattarfittaartoqarneratigut qularinngilluinnarpara timersornerup tungaatigut, pingaartumik isikkamik arsaannerup tungaatigut qangamut sanilliullugu Narsarmiut periarfissarissaarnerulersinneqartut aammalu qularinngilara periarfissat nutaat Narsarmiut atorluarumaaraat, borgmesteri Kiista P. Isaksen oqarpoq.

Qaqortoq Nanortalillu 2018-imi upernaakkut aamma arsaattarfittaassasut, Kommune Kujalleq tusagassiuutinut nalunaarummi allappoq.