Napparsimanermi sillimmasiineq oqaluuserissavaat
![](/sites/default/files/styles/image_934x467/public/article_images/ventevaerelse_630_1.jpg?itok=PK2Y31ey)
- Ukiuni kingullerni Peqqinnissaqarfimmut aningaasaliissutit amerliartuinnartut ilisimavagut. Taamaattumillu aningaasat ilaqutaasut ilaanissaanut akiliunneqarnissamut atussagutsigit, taava napparsimasut pitsaasumik sullinneqarnissaanniit aningaasat ilanngaatigisariaqalissapput Tamannalu tamatsinnut orniginanngilaq, Debora Kleist oqarpoq.
Taamaattumik arlaatigut iliuuseqarnikkut akiliussinissaq qulakkeerneqartariaqartoq Debora Kleist isumaqarpoq.
- Inuiaqatigiinni tamatta ajornartorsiut taanna qaangersinnaajumallugu, annertunngikkaluamik qaammammut akiliuteqartalersinnaanissaq periarfissatut atussavarput? Assersuutigalugu akiliuteqartalernermik sillimmasiinertut ittumut aaqqissuuneqarsimasumik, Debora Kleist aperivoq.
Napparsimanermi sillimmasiisarnermik aaqqissuussineq taamaattoq, innuttaasut akileraartussaatitaasut tamarmik ukiumut 1.380 koruuninik akileraarnerulernissaannik kinguneqassasoq Naalakkersuisut akissutaanni erserpoq.
- Aaqqissuussinerup nappaatinut aalajangersimasunuinnaq atuutsinneqarnissaa kissaatigineqarpat, ileqqorissaarnissap tungaatigut kikkut ilaatinneqarnissaat kikkullu ilaatinneqannginnissaat eqqarsaatersuutini ilisimalluaqqissaarneqartariaqartoq, Peqqissutsimut naalakkersuisoq Agathe Fontain oqarpoq.
Aaqqissuussineq taama ittoq atuutilersinneqassappat, pissutsit apeqqutillu aaqqissuussinerup nassatarisai isummerfigineqartariaqartut pingaarutillit Naalakkersuisut saqqummiussaat ilaatigut tassaapput: Qanigisaasup piffissami ingiaqataanermi nalaani sulinnginnissaa, tamatumalu kingunerisaanik inuiaqatigiit ullunik suliffiusunik amerlasuunik annaasaqarnissaat. Aamma qanigisaasup ingiaqataanermi nalaani isertitassaagaluaminik annaasaqarnissaa. Minnerunngitsumillu sulisup qanigisani ingiaqatigissappagu, sulisitsisup qaningisaasoq pinngitsoorani sulinngiffeqartissaneraa naalakkersuisut akissumminni apeqqutigaat.
Debora Kleistip siunersuutaa taasissutigineqarmat amerlanerussuteqarluartunit taperserneqarpoq.