Nappaalanersuaq Atlantiku ikaarlugu takkutilerpoq
Qallunaat tusintilikkaat tamassa puakkut nuffersoornermi eqqorneqarput ilaasalu sivitsuloorutigisarlugu. Ilimatsaanneqarporlu nunatsinni qanittumi taamatut nappaalasoqalerumaartoq.
- Tamannarpiaq eqqartukkatsinnut ilaavoq marlunngorneq decemberip arfineq aappaanni ataatsimeeqatigiinnitsinni. Ilimagaarpummi erininarserianngitsoq nappaalaneq taanna nunatsinnut aamma anngukkumaartoq, taama KNRimut oqarpoq Sisimiut nakorsaqarfiani pisortaq Ove Rosing Olsen.
Panertumik puakkut nuffersoorneq tassaavoq puakkut nuffersoortarnerit ukiut tamaasa inuppassuarnik eqquisartut ilaat.
Puakkut nuffersoortarnermut ilisimaneqarnerusumut sanilliuluni kissarneqarnarpallaannginneruvoq. Nakorsaatitoqqaarlunili aatsaat qaangerneqartarpoq.
- Oqaatigisinnaavara pujortartartut sivitsuloorutiginerusaraat pujortarneq ajortunut sanilliullutik, taama Ove Rosing Olsen nassuiaavoq.
Sisimiulli nakorsaqarfiat nunatsinni kisiartaanngilaq nappaammik tassannga nappaalalersunik amerlanerusunik suliaqarnissamut ilimasuttuni.
Ilulissani nakorsaqarfiani pisortaq Eskild Boeskov ilimasuppoq nappaalaneq taanna januarip qaammataani takussaanerulerumaartoq.
- Nappaalanerit annertuut Danmarkimi atuutileraangata kingulliulaarluni Kalaallit Nunaat eqqungaasarpoq. Ilimagaara januarip qaammataani tamanna takussaanerulerumaartoq, taama Eskild Boeskov oqarpoq.
Nakorsat oqaatigaat nappaat taanna sapaatit akunneri pingasut angullugit eqqorneqartut napparsimassutigiumaaraat.