Nanortallip eqqaani 15-inik niisarnattoqartoq

- Niisarnanik eqiteruttunik aatsaat taama amerlatigisunik takuvunga, sunngiffimmi pinialuttartoq Augustinus Augustinussen oqarpoq.
Niisarnat sissamut Nalunamik atilimmut pinialuttartunit umiatsiaaqqanik arfineq-pingasunik ungoorneqarput. Assi © : Augustinus Augustinussen
septembarip 11-at 2019 10:28
Nutserisoq Hanne Petersen

Itillersuarmi Nanortallip eqqaaniittumi sapaatit akunnermi qaangiuttumi 15-inik niisarnattoqarpoq. 

Niisarnartallu Kujataani pinialuttartunit niisarnanik qaqutigoortumik pisaqartartunit tupaallaatigineqarput, sunngiffimmi pinialuttartoq Augustinus Augustinussen KNR-imut oqarpoq.

- Misigisaq alutornarlunilu pissanganarpoq, Augustinus Augustinussen oqarpoq.

- Niisarnanik eqiteruttunik aatsaat taama amerlatigisunik takuvunga. 

Niisarnat sissamut Nalunamik atilimmut pinialuttartunit umiatsiaaqqanik arfineq-pingasunik ungoorneqarput. 

- Qoorortuunik aallaavagut. Pisarioqqaalaarpoq, sapinngisamilli naalliutsinnginnissaat qulakkeerumallugu piffissap ingerlanerani paasivarput sukkut sumilu aallaassanerlutigit, Augustinus Augustinussen oqarpoq.

AAMMA ATUARUK Qaqortumi aalisartoq: Isumaqaraluaratta kalaallit eqalussuarigaat

Niisarnat Atlantikup Avannaata imartaani uumasuupput, Kitaatalu imartaanukartarnerat qaqutigoortuunngilaq, Nynne Nielsen Pinngortitaleriffimmi ilisimatusartutut atorfeqartoq oqarpoq. 

- Qaqutigoortorsuunngilaq. Niisarnat eqiterullutik ingerlaartarput, arferillu anginerit kisimiillutik ingerlaartarput, Nynne Nielsen niisarnartat 15-iusut tunngavigalugit oqarpoq. 

Niisarnanik nunatsinni pisassiisoqartanngilaq. KNAPK-li naapertorlugu niisarnartat pisarinnittunit nalunaarutigineqartartussaapput.