Ujarassiorit Nanortalimmioq Ujarassiorimi ajugaavoq

Akissarsiat annersaannik 55.000 kr-nik aningaasartaqartunik akissarsitinneqarpoq Apollonie Josiassen Nanortalimmeersuuvoq.

Apollonie Josiassen akissarsiat annersaannik akissarsitinneqarneranut pissutaavoq, ujarak nassiussimasaa qaarsup ujaraa gnejs sulfid-itaqarmat, taanna Illorsuarni Nanortallip avannaani nassaarivaa.

Apollonie Josiassenip ujaraq nassiusaa zink-imik 0,24 %-imik akoqarpoq nalinginnaanngitsumillu annertuumik indium 0,1%-isut atsigisumik akoqarluni, Namminersorlutik Oqartussat tusagassiuutinut nalunaaruteqarlutik taama allapput.

Naak ujaqqap ajugaassutigineqartup erseqqissumik zinkip sumi nassaassaanera paasinarsisinngikkaluaraa ujaqqamik misissuinerup inernera zink-italinnik aatsitassaqarneranut tikkuussisuuvoq, Namminersorlutik Oqartussat taama allapput.

Zink tassaavoq saffiugassaq nalinginnaasoq annerusumillu saffiugassanut allanut manngertorninaveersaatitut naqillugit ilusilikkatut atortussiatut qaliaatitullu atorneqarpoq.

Indium LCD-skærm-it elektrode-annut atortullu qaavisa qalippernerinut atorneqartarpoq.

Ajugaasup tullia 25.000-inik koruuninik pinnattoq tassaavoq Arnatsiaq Nielsen Isaksen. Arnatsiap ujarak Kujataani Aappilattup akiani nassaaraa, erseqqissumillu suussusersineqanngikkaluartoq akumigut soqutiginaateqarpoq

Ujaqqap nassaarineqartup ilimanarsisippaa sumiiffimmi tassani maannamut ilisimaneqanngitsunik Narsap eqqaanisut ittunik aatsitassanik alkalin-iusunik peqarmat.

Ajugaasut sinneri Namminersorlutik Oqartussat nittartagaanni Naalakkersuisut gl-mi atuarneqarsinnaapput.