Nanoq.gl malinnaarpiarunnaartoq

Piffissami sivitsulersumi malunnarsiartorsimavoq - nanoq naggat gl massakkorpiaq pisunut malinnaarpiarunnaarsimasoq paasissutissaaterpassuisalu ilaat qanganitsilersimasut.

Tamatumunnga pissutaasoq pillugu Namminersornerullutik oqartussat Tusagassiivianni, nanoq gl-mik aamma ingerlatsiviusumi pisortaq Emma Kristensen ima naasuiaateqarpoq:

- Tusagassiivimmi inuttatigut piffissami sivitsortumi amigartumik inissisimasoqarsimavoq, aasallu qaangiunnerani inuttatigut aatsaat naammatsikkiartuaalersimalluta. Taamaattumik nittartakkap nanup pitsaanerusunngortinnissaa, ullutsinnillu naapertuunnerusunik paasissutissanik imaqarnerulernissaa maannakkut tassa samminialerparput.

Emma Kristensen oqarpoq nangillunilu:

- Nittartakkamut ilioqqaasartut, tassa qallunaatut Webmasterinik taagorneqartut piffissami sivitsortumi amigaataasimapput, Tusagassiivimmilu sulisut piffissami sivisulaartorujussuarmi marluinnaanikuullutik. Pisortaqarfiit 14-iusut webmasterinik peqalernissaat massakkut sulissutigivarput, webmastereqalerpallu nutarsaaniarneq soorunami ajornannginnerusumik ingerlalertussaavoq.

Nanoq naggat gl-imik nutarsaanissap qanoq akeqarumaarnissaa suli naliliiffigineqanngitsoq Emma Kristensen aamma oqarpoq.