Nannut ukiuni 20.000-ini ikiliartuinnavissimapput
Nunarsuarmi nannuni anginerpaap – nannup – navianartorsiornera pillugu nutaarsiassaq qangali tusarliunneqarpoq.
Oqaluttuarlu tamanna aamma nutaajunngilaq. Kalaallit Nunaata nanuata DNA-vanik misissuinerup nutaap takutipaa Kalaallit Nunaanni nannut ukiuni 20.000-ini kingullerni ataavartumik ikiliartorsimasut.
Ilisimatusarnermi nutaami tassani Globe Institute adjunkti Michael Westbury aamma professori Eline Lorenzen misissuisuupput.
Tassani nannuni maanna uumasuusuni DNA nerisallu misissorlugillu akusiorsimavaat. Sila pillugu oqaluttuarisaanermi paasissutissat aamma misissorsimavaat.
- Akusiuinitta takutippaa kingullermik sermersuaqarnerata nalaanit nannut amerlassusaat arlaleriarlutik ikileriarujussuarsimasut, Eline Lorenzen oqarpoq.
Allanngornimininnguit sakkortuumik sunniutillit
Soorli ineriartorneq taamaappa soorlu nannut ukiuni 20.000-ini ikiliartorsimappat?
Michael Westburyp oqarnera naapertorlugu pisariitsumik nassuiaatissaqarpoq.
- Imaq kissarnerulerpat imaani siku millissaaq taamaalillunilu puisit nannunit inuussutigineqqartut ikilissallutik, Michael Westbury tusagassiorfinnut nalunaarummi nassuiaavoq.
Paasissutissanik akusiornermi ilisimatusartunit suleqataannillu tupaallaatigineqarnerpaavoq avatangiisini allanngornimininnguaq nannunut qanoq sunniuteqartiginerat.
- Tassami immap kissarnerulaalernera, imaanilu sikup annikinnerulernera nannut amerlassusaasa ikilerujussuarnerannik nassataqarpoq, Eline Lorenzen oqarpoq.
Siunissaq qanoq isikkoqarpa?
Nunarsuup kissatsikkiartornera unikkallarunnanngilaq tamannalu nunatsinni ersarilluinnarpoq.
Immallu ajornerpaassappat 2-5 gradenik kissarnerulerumaarnera nannup atugaanut iluaqutaanavianngilaq.
Piffissarli ungasinnerusoq eqqarsaatigalugu nanoqartuaannarnissaanut neriuutissaqalaarpoq.
Ilisimatusarnerummi takutippaa Tunumi nannut nerisatik allanngortissinnaagaat. Imaappoq nerisassat pillugit unammisariaarutissasut tamanullu naammattumik nerisassaqassalluni.
- Angutivissat puisit suussuseqatigiiaat assigiinngitsut nerisarisarpaat arnavissat natsernik nerisaqarlutik. Uumasoqatigiiaat taamaaliorsinnaasarput isumalluutit ikiligaangata, Michael Westbury oqarpoq.