Nannut illoqarfimmiit qimaatinneqartarnissaanni nakkutilliisut imassallu gummiusut atorneqartassapput
Nannut kaattuut Illoqqortoormiuni ukiuni kingullerni innuttaasunik ulorianartorsiortitsisalerneri pillugit tamassuma qanoq iliuuseqarfiginissaannut periutsit assigiinngitsut atorneqalernissaat siunniunneqarput, soorlu eqqaavissuarmi qullilersuinissaq, mianersoqqussutinik allagartalersuinissaq taamatullu nakkutilliisussamik pilersitsinissaq siunniunneqarlutik.
Nunarsuatsinni silap kissakkiartornera ilutigalugu Tunumi ukiumi sikusartoq annikilligaluttuinnartoq ilutigalugu, nannut kaattut Illoqqortoormiunut qanillattortut amerlanerulersimaneri innuttaasunit takornartaajunnaarpoq.
Nannut illoqarfimmut qanillattortut qimaatinniaraanni aallaammik silaannarmut eqqaassineq atorlugu taakku qangaanersoq qimaatinneqartarput. Tamannali maanna iluaqutaajunnaarsimavoq.
WWF-ip Illoqqortoormiuni innuttaasut ataatsimeeqatigaat
Nunarsuaq tamakkerlugu pinngortitaq pillugu suliniaqatigiiffimmit, WWF-imit, tamassuma qanoq iliuuseqarfigineqarnissaa pilluni Illoqqortoormiuni innuttaasut maajip aallartinnerani ataatsimeeqatigineqarput. Siunnersuutillu arlallit oqaluuserineqarlutik.
Soorlu nakkutilliisussamik sulilersitsinissaq, aallaasip imassaat gummit manngertut atorlugit qimaatistsisarnissaq taamatullu eqqaavissuarmi qullilersuinissaq.
Nakkutilliisut atorneqalissapput
Nannut kaattut eqqaavissiortarneri pillugit nakkutilliisussamik sulilersitsinissaq, Nunarsuaq tamakkerlugu pinngortitaq pillugu suliniaqatigiiffimmit, WWF-imit akilersorneqassasoq siunnersuutigineqarpoq, taamatullu siunnersuutigineqarluni qimmit nerukkaatissaannut pooritinneqartartut aserorteruminaannerit atorneqartalernissaat. Tamanna pillugu WWF-imi sulisoq, John Nonbo ima oqarpoq.
- Nakkutilliisussamik sulilersitsinissaq eqqarsaatigalugu taassuma kikkunnit aningaasaliiffigineqarsinnaanera aasaq manna suliassatta pingaarnersariassavaat. Tassami meeqqat ullaakkut atuariartornerminni taamatullu inersimasut suliartornerminni nannunik kaattunik naapitsinnginnissaat pingaaruteqarluartutut isigaarput, John Nonbo oqarpoq.
Kommunalbestyrelsimit isumaqatigineqarluarpoq
Illoqqortoormiuni eqqaavissuup qullilersorneqarnissaa taamatullu mianersoqqussitinik allagartanik ikkussuisoqarnissaa, Kommuneqarfik Sermersuumi kommunalbestyrelsemi ilaasortanit juunimi oqallisigineqartussaasoq, kommunalbestyrelsemi Atassut sinnerlugu ilaasortaq Illoqqortoormiormiu, Erling Madsen oqarpoq imalu nangilluni.
- Illoqqortoormiuni innuttaasunit ataatsimiinnermi piumasarineqarpoq, eqqaavissup tungaanut qullilersuisoqassasoq taamatullu nannut sikumiit immamiilluunnit tikittagaat, Qinngaajuutip tungaa qullilersorneqassasoq. Paasivaralu taakku siunnersuutigineqartut Kommuneqarfik Sermersuumit inussiarnersumik tiguneqarlutik paasineqarsimasut, tamannalu nuannaarutigaara.
Kommuneqarfik Sermersuumi kommunalbestyrelsimut ilaasortaq, Erling Madsen taama oqarpoq.
Canadami Alaskamilu nannut illoqarfinnut qanillartortartut pillugit qanoq iliuuseqarniarnermi nakkutilliissunik atorfinitsitsisoqareerlunilu qimmit nerukkaatissaannut pooritinneqartartut aserorteruminnaannerusut atulersinneqareerput.
Nannut illoqarfinni ajornartorsiutaalersimaneri pillugit siunissaq ungasinnerusoq eqqarsaatigalugu aaqqiissitissanik allanik nassaartoqartariaqartoq, WWF-imit naqissuserneqarpoq.
