Takornariaqarneq: Nannunik kujataata kangiani takornariartitsisoqartalissaaq
Aappaagu aasap qaammatai aallartippata takornarissat Kujataata kangiani nannunik qanillivillugit misigisaqarsinnaalissapput.
Tamanna pisinnaalerpoq Kujataamiu Poul-Erik Frederiksen ukiorpassuarni utaqqereerluni nannunik takornariartitsinermik aaqqissuussisarnissamik Naalakkersuisunit akuersissuteqalermat.
- Soorunami nuannaarpugut. Ukiorpaaluit suliaq ingerlannikuugatsigu, ukiut arfineq -marluk sinnerlugit suliaq ingerlanikuuvoq, maannalu taama akuersissummik tunisisoqarnera assorujussuaq uagutsinnut nuannaarutaavoq.
Poul-Erik Frederiksen Kujataata kangiani kisiartaalluni nunatta uumasuanik inuuffianiittumik takornariartitsisarnissamik akuersissuteqarpoq.
Nannut pillugit nalunaarut qinikkanit marsimi akuerineqarpoq, tassanilu akilerneqarluni nannunik takornariartitsisarnissamik neqerooruteqarnissaq periarfissaalerluni.
Ikittuinnaat misigisinnaavaat
Poul-Erik Frederiksen angalatitsinernik ammaaguni suleqatai nunaqavissuussapput. Nunaqavissut 30-t eqqiaanermiit, qulimiguulimmik aquttumut, umiatsiamik aquttumut eqqartuussisuserisullu sulisuussapput, piniartulli aamma angalanerni takornariat ikittuinnaat ilaaffigisinnaasaanni takusassarsiortitsisassallutik.
- Nannunik takornariartitsinermut inatsit takornariartitsinerni allanit sukanganerupput, taamaammallu angalanerni ataasiakkaani ilaasinnaasut ikittuinnaasinnaallutik. Umiarsuit takornariartaatit taamaammat aamma sullinnavianngilagut, Poul-Erik Frederiksen oqarpoq.
Piffissaq suliffiusoq sivikitsoq
Takornariat amerlassusaasa killeqarnerisa saniatigut aasaanerani taamaallaat nannunik takornariartitsisoqarsinnaassaaq. Sumiiffimmi pinngortitap nukingi pissutaasut takornarialerisoq oqaluttuarpoq.
- Sikoqartarnera pissutigalugu qaammatini aasarisseruttornerani taamaallaat takornariartoqarsinnaassaaq.
- Ukiup sinnera nammineerluni pinngortitap matusarpaa, umiarsuarnit, qulimiguulinnit allaniillu ukiup sinnera tikinneqarsinnaajunnaavittarpoq, oqarpoq.
Niuernermik ingerlatsilernissani takornarialerisup taamaammat aappaagumut utaqqissuttariaqarpaa, oqaluttuarporli piareersimalluinnarluni.
