Sisoraaserluni ooqattaasarneq: Nanna Møller Nuummeersoq inuusuttuaqqani VM-eqataassaaq

Tysklandimi sisorartarfissuarmi erfalasorput februaarip naanerani marsillu aallartilaarnerani amuneqarumaarpoq inuusuttuaqqat sisoraaserluni ooqattaasarnermi VM-ilerpata, nunarsuarmi pissartanngorniutilerpata.

Tassami Nanna Møller Nuummeersoq Nunarput sinnerlugu peqataalerpoq. Qanoq ingerlajumaarnissaa pissanngatigineqarpoq misilittarneqarlutik unamminerminni Norgemi pikkorissunut unammillerluareersoq.

- Norgemi sportscollegemi maanna atuarpoq ukioqatimini sisoraaserluni ooqattaasallaqqinnerpaat akornanni, Nanna Møllerip angutaa aamma sisoraatinik oqilaniunnermi nuna tamakkerlugu sungiusaasoq Martin Møller oqarpoq.

Sisorartartut assakaasulinnik sisoraaserluni piffissami sivisujaami sungiusarput.  Norgemi sisorartarfiit maanna apisimalermata misilittarneqarlutik unammisalerput.

- Pikkorissunik sungiusaqateqartarnissaq pingaarutilerujussuuvoq pikkoreqatit immaqaluunniit pikkorinnerulaat akornanni. Kisianni aamma pikkorinneruallaassanngillat, Martin Møller oqarpoq.

VM-imi affaanit pikkorinnerit akornanni

Atuarfimmi sungiusaasugissaarput piukkunnaatilinnik inerisaanermi misilittagaqarluartunik. Misilittaalluni atuarfimmi unammisoqarnerani Nanna Møller peqataaqqammivoq tassanilu ujaminnattut akornanniippoq.

- Norgemi ukiortaap kingorna  pissartanngorniuttuni unammeqataasussaavoq. Tassani qanorluunniit pisoqarsinnaavoq. Soorunami pikkorilluinnartunik peqataasoqassaaq, kisianni ullugissaarfimmi ooqattaasarluarnermi ujaminnattut akornanniittoqarsinnaavoq, Martin Møller oqarpoq ullorsiutillu malillugit kingusinnerulaartukkut pisussat qimerloorlugit.

- Sisoraaserluni ooqattaasarnermi  inuusuttuaqqat marsimi VM-ilerpata peqataassaaq. Nukarlernut suli ilaavoq. 17-inik ukioqalingajalerpoq peqataasullu 19-it angullugit ukioqarlutik. Ilikkagaqarfigisinnaaqaa ukiuni tulliuttuni marlunni pitsanngoriartuutigisinnaasaminik, Martin Møller oqarpoq.

Sisoraaserluni ooqattaasarnermi VM-ertoqarnerani  Nunatsinniit siornatigut peqataasoqartarpoq ilaqutariit Slettemarkikkut angusarissaartarmata. Taakku aamma suleqataalluarput ooqattaasarnermi sungiusartarfeeqqamik Nuummi  pilersitsisoqarneranut tassanilu luftgeværit atortarpaat.

Sisoraaserlutik ooqattaasartartut nutaat nunani allani maanna unammisalerput.

- Isumaliorpunga VM-ertoqarnerani angusaq pitsaassasoq affaani qullerniittuuppat. Tassa 100-ut aallarpata normu 50 missaanniilluni, Martin Møller oqarpoq.

Inuusuttuaqqat sisoraaserlu ooqattaasarnermi VM-eqarnerat Tysklandimi sisorartarfimmi Aberimi pissaaq.