Siumut: Namminiilivinnissap qamutaani tamatta inissaqartariaqarpugut
- Namminiilivinnissap qamutaani tamatta inissaqartariaqarpugut, uagut katataqarnianngilagut. Aamma oqarusuppunga namminiilivinnissap qaqqaanut tamatta tappavunga qaqisinnaagutta, tassa nuannisaaqaaq nuannaaqateqassagatta, Apriilip 24-ani qinersinissatsinnut Siumup politikkikkut suliniutai pillugit pingasunngormat tusagassiuutinut saqqummiunneranni Kim Kielsen oqarpoq.
Siumup naalakkersuisooqatigisimasaata Partii Naleqqami nunatta 2021-imi naalagaaffinngornissaa kissaatigigitsik tallimanngormat saqqummiuppaat.
AAMMA ATUARUK Kielsen Siumukkullu qineqqusaarutissaaleqinngillat
Nunattali qaqugu namminersulerumaarnera innuttaasunit aalajangerneqassasoq Kim Kielsen oqarpoq. Taanna ulluleerusunngilaq.
- Politikkikkut siunnerfigut suliarissavagut taava innuttaasut namminersornermut inatsit naapertorlugu misigippata piareerlutik, taava taasititsineq ingerlanneqassaaq.
AAMMA ATUARUK Borgmesteriusimasut partiinilu nuussimasut Siumumit qineqqusaalersut
Partii Naleqqap ukiut pingasut qaangiuppata namminiilivinnissamut siunertaqarnini imaaliallaannaq piviusunngorsinnaanngitsoq nassuerutigereerpaa.
Kim Kielsenillumi innuttaasut tamarmik peqataanissaat pingaartippaa.
Namminersulernissamut sanngiinnerit akigineqassanngitsut Kim Kielsenip tusagassiortunik katersortitsinermini naqissuserpaa.
- Kisimiilluta sapernata qummut arpakkutta sanngiitsortavullu naqqaniittut, taava sumut iluaqutaassava?, Siumumi siulittaasoq Kim Kielsen oqarpoq.
AAMMA ATUARUK Nunatta 2021-mi naalagaaffinngornissaa piviusunngortikkuminaassinnaavoq
Nunatta 2021-mi naalagaaffinngornissaa piviusorsiornerunngitsoq Partii Naleqqap siulittaasuata Hans Enoksenip pingasunngormat Qanoruumut nassuerutigaa. Namminiilivinnissarmi piviusunngussappat suli suliassaqangaatsiarpoq, aningaasaqarneq akisussaaffeqarfiillu amerlasuut Danmarkimit Nunatsinnit tiguneqartussat assersuutissaallutik.
