Namminersulivinnissamut pisuussutit uumaatsut aqqutaassapput
Naalakkersuisut siulittaasuat Kuupik V. Kleist isumaqarpoq, suliniutit angisuut maanna aallartinneqanngippata, tamanna periarfissanik ilaginnaanerussasoq.
Taanna oqarpoq ataatsimoortumik tapiissutit, maanna ukiumut 3,2 milliardit koruuniusut aamma aalisarnermit isertitat Nunatsinni aningaasarsiornikkut kisimik tunngavigineqarsinnaanngitsut.
Kuupik V. Kleistip tusagassiortunik nunanit tamalaaneersunik 40-t missaanniittunik Københavnimi ippassaq naapitsinermini, Nunatsinni aatsitassarsiortoqalersinnaaneranut, Nunatsinni ineriartortitsinissamut periarfissat saqqummiunnerinut atatillugu tamanna oqaatigaa.
- Soqutiginninnerujussuaq eqqasuuteqarnerlu qallunaat politikeriinnaanngitsunit, aammali EU-mit ersersinneqartut, uagut kalaallit nuannaarutigisinnaavavut. Kalaallit Nunaat nunat ilaannik niueqateqaqqunagu kajumissaarneqartarpoq, Kuupik V. Kleist oqarpoq.
Tamanna naapertuilluanngitsutut isigaa, tamatumami peqatigisaanik qallunaat angalatitaat tulleriiaaginnarmik ministeriuneq siuttoralugu Kinamut angalasarmata, Kinamiut Danmarkimut aningaasaliinissaat illuatungaatigullu Danmarkip aningaasaliinissaa neqeroorutigisarlugit. Tamakku Nunatsinnut atatillugu assigiinngissusaat Kuupik V. Kleistip takujuminaatsippaa.
Suliniutit angisuut pillugit inatsit aamma nunani allamiut Nunatsinni sulisorineqartussat atugassaat pillugit aalajangersakkat tuaviuussaanngimmata, taassuma erseqqissarpaa.
