REKTORI Namminersorlutik Oqartussat ilisimatusarnermut aningaasaliinerusariaqarput
- Nammineq ulluinnarni malugisarparput universitetit assigiinngitsorpassuit Danmarkimi kisiat aamma nunaninngaanneersut kissaatigisaraat uagut ilisimatusartuutigut suleqatiginissaat, taavalu aamma nunatsinni misissuinernik suliniuteqarusullutik saaffiginnittartut amerlasaqaat.
Tine Pars taama oqarpoq, erseqqissarlugulu ilisimatuut katersuuttarfissaannik pilersitsinissamik isumap pitsaassusia Namminersorlutik Oqartussani takusinnaasariaqaraat.
Ilisimatusarnermut aningaasat amerlanerusut
Ilisimatuut katersuuttarfissaannik pilersitsinermi Issittoq pillugu ilisimatusartut nunanit assigiinngitsuneersut Kalaallit Nunaanni katersorneqarsinnaapput. Siunnersuulli qanoq aningaasalersorneqassanersoq siunnersuutigineqanngilaq. Isumali taanna pillugu Namminersorlutik Oqartussat oqaloqatigeqqaartariaqarput.
Tine Parsili naapertorlugu Namminersorlutik Oqartussat naliginnaasumik Kalaallit Nunaanni ilisimatusarnermut amerlanerusunik aningaasaliisariaqarput.
Aamma atuaruk Issittumi ilisimatusarnermi Kalaallit Nunaat katersuuffiussaaq
- Iluassagaluarpoq nunarput soorunalimi aamma aningaasaleeqataappat, taamaasilluni aamma ilaa atorsinnaanissaa siammasinnerpaassaaq, taavalu aamma nunatsinnut iluaqutaasumik ilisimatusartoqarsinnaanissaa angussagutsigu, Tine Pars oqarpoq.
- Aallaqqaammut oqarsinnaavugut: Kalaallit Nunaata ilisimatusarnernut aningaasat qassit ullumi atortarpaat? Aamma suut aningaasalerneqarnerusinnaappat? Isumaqarpunga inuiaqatigiit kalaallit tamatumunnga aamma aningaasaliisariaqartut.
Ilisimatuut katersuuttarfissaannik pilersitsinissaq aamma nunani allamiut misissuisarfiinit atueqataasunit akileeqataaffigineqarsinnaasoq, Tine Pars taama siunnersuuteqarpoq.
Ilimmarfik anginerussaaq
Aammalu Ilisimatusarfik qanittumik suleqatigineqassasoq misissuisarfissarlu Nuummiittariaqartoq.
- Uanga nammineq isumaqarpunga uagut ilisimatusarfittut nunani allamiut danskillu Kalaallit Nunaanni ilisimatusartut suliniutaannut peqataanissatsinnut pisariaqartitsisugut. Aammalu kalaallit ilisimatusarfiat peqatigalugu ilisimatusartut suleqatigiiffissaminnik katersuuffissaqartariaqartut, Tine Pars oqarpoq.
Aamma atuaruk Danskit issittumi ilisimatusarnermut iliuusissatut pilersaarusiortut
