Amerikamiut Kalaallit Nunaanni sakkutooqarfikuini saliineq ukiut qulit sinnerlugit kinguaattoortoq
Amerikamiut Kalaallit Nunaanni sakkutooqarfiisa salinneqarnissaat sivisuumik ingerlasimavoq, siusinnerpaamillu 2033-mi naammassineqarnissaa naatsorsuutigineqarpoq, politikken taama allappoq.
Allattoq Ritzau
juulip 13-at 2026 07:45
Nutserisoq Brian Jensen
Amerikamiut sakkutooqarfiisa Kalaallit Nunaata kangianiittut arlallit salinneqarnissaat 2033-mi aatsaat naammassineqassasoq naatsorsuutigineqarpoq.
Suliarli 2023-mi naammassereersimassagaluarpoq.
Tamanna Politikenip piffissaliussaq pillugu pissarsiarisimasaanit erserpoq.
Politiken naapertorlugu danskinit kalaallillu aqutsisoqatigiit killiffik pillugu nalunaarusiaanni aamma allassimavoq; Kalaallit Nunaanni sakkutooqarfiit sinnerini saliineq piffissaliunneqanngitsumik ingerlaqqissasoq.
Aqutsisoqatigiinni Danmarkimi Avatangiisinut Ministereqarfik, Illersornissaqarfik kiisalu Kalaallit Nunaanni Avatangiisinut Naalakkersuisoqarfik ilaasortaapput.
Aqutsisoqatigiit naapertorlugit suliaq ajornakusoortuuvoq, tassami sakkutooqarfiit amerlasuut avinngarusimasumiipput, nunatsinnilu silap pissusia suliamik ajornakusoortitsivoq.
Amerikamiut siornatigut sakkutooqarfigisimasaasa eqqaanni pinngortitami suli eqqakkat, ilaatigut uuliamut nappartat manngertornisut takussaapput.
Sakkutooqarfiit taakku ukiuni amerlasuuni matuneqareersimapput, Danmarkimilu oqartussat salinneqarnissaat pillugit polkitikkikkut 2018-imi isumaqatigiissuteqarput.
Taamanikkut 2018-miit 2023-mut sakkutooqarfiit 17-it matuneqarsimasut salinneqarnissaannut 180 millionit koruunit immikkoortinneqarput. Sakkutooqarfiit ikittuinnaat maanna salinneqareerput.
Danmarkimi Avatangiisinut Ministereqarfik Politikenimut paasissutissiivoq; aningaasat 2026-p aallartinnerani immikkoortinneqartut taakkunannga 48 millionit koruunit atorneqareersimasut.
Taamaalilluni aningaasat sinneruttut 159 millionit koruuniupput.
Danmarkip nunanut allanut ministeria Lars Løkke Rasmussen (M Politikenimut; Danmarkip USA saliinermut aningaasartuutit akilernissaannut suleqatigiissinniartariaqaraa sapaatip akunnerani matumani oqarpoq.
-Mingutsitsisoq akiligassinneqartariaqarpoq. Tamanna tunngaviusumik pitsaasuuvoq, isumaqatigiissutinilu tamani ilanngunneqarsinnaasuuppat nuannaarutigissavarput, Løkke oqarpoq.
Oqaaseqarnera Danmarkip USA-llu sakkutooqarfiit pillugit nutaamik isumaqatigiissutissaq isumaqatiginninniutigineqarnera kingorna pivoq. Isumaqatigiissummi ilaatigut Kalaallit Nunaanni sakkutooqarfinnik pingasunik nutaanik pilersitsineq pineqarpoq.
Isumaqatiginninniarnerit, USA-p præsidentia Donald Trumpip Kalaallit Nunaat tiguarusunnerarlugu arlaleriarluni oqareersimanerata kingorna aallartinneqarput.
