Ministeri Issittumi ilisimatusarnermi Kalaallit Nunaat katersuuffiussaaq

Danskit naalakkersuisui Issittumi ilisimatusarnissamut pilersaarutaasa ilaat taamaapput.

Nunat assigiinngitsut ilisimatusarnermi qitiusumik misissuisarfilernerisigut, Kalaallit Nunaat tassaasariaqarpoq Issittumi ilisimatusarnermi siuttuusoq.

Taama oqartoq tassaavoq danskit ilinniartitaanermut- ilisimatusarnermullu ministeriat Ulla Tørnæs.

- Takusinnaasakka malillugit Naalagaaffeqatigiit issittumi ilisimatusarnermi, ilinniartitaanermi nutaaliornermilu nukittorsaasariaqarput.

Aamma atuaruk Danskit issittumi ilisimatusarnermut iliuusissatut pilersaarusiortut

Nunatsinnit isumaqataaffigineqartariaqartoq

Siunnersuut tassaavoq danskit naalakkersuisuisa danskit Issittumi ilisimatusarnerannut iliuusissaannut suliniutaat.

Ilisimatusarnermi qitiusumik misissuiffittaartariaqarneq aamma upernaaq Taksøep nalunaarusiaani saqqummiunneqarpoq, kingornalu kalaallit Folketingimi ilaasortaatitaannit taperserneqarluni.

Tamannali aatsaat piviusunngortinneqarsinnaavoq Kalaallit Nunaat tamatumunnga isumaqataappat. Ilinniartitaanermummi ilisimatusarnermullu tunngasut kalaallit namminneq tigoreernikuuaat.

Aamma atuaruk Issittumi ilisimassarsiortut millionilippassuarnik EU-mit tapiissuteqarfigineqarput

- Erseqqissarusuppara Issittumi ilisimatuutut misissuiviliornissaq taamaallaat Kalaallit Nunaanni Namminersorlutik Oqartussat qanittumik suleqatigalugit pilersinneqarsinnaammat.

Kalaallit Nunaanni ilisimatuutut misissuisut amerlineri ilinniartunut aamma iluaqusiissaaq:

- Ilisimatuut nunat assigiinngitsut akornanneersut Kalaallit Nunaannukaasalerpata neriuutigaara sivisunerusumik taavaniittarnissaat, aammalu ilinniarfinni Ilisimatusarfimmilu qaaqquneqarlutik oqalugiariartortinneqartarlutik.

Taavalu Kalaallit Nunaanni ilisimatusarnerit inerneri innuttaasunut annerusumik siammarneqartarlutik.

Paasiuminarsarlugit saqqummiunneqartassasut

Ilisimatuut paasisaat apuunneqartassapput innuttaasunut iluaqutaasumik tusagassiorfimmit naalagaaffimmit taperserneqartumit paasiuminarsarluakkatut suliarineqarlutik.

- Pingaaruteqarpormi Kalaallit Nunaanni ilisimatusarnikkut paasisat kalaallinut inuiaqatigiinnut iluaqutaanissaat, ministeri Ulla Tørnæs taama oqarpoq.

Nunatsinnili ilisimatuutut misissuivittaassamut aningaasanik immikkoortitsisoqarsimanngilaq. Aningaasaliinnginnermi periarfissat misissorluarneqaqqaassapput nalilersorneqarlutillu, Ulla Tørnes oqarpoq.

Aamma atuaruk Aalborgip Universitetiata issittoq pillugu ilisimatusarneq annertusaraa