Oqaluttuarisaanermik ilisimatusartoq: Namminersorlutik Oqartussat Danmarkip atorunnaarsittariaqarpai
Oqaluttuarisaanermik ilisimatusartup allaatigisamini erseqqissaatigaa qallunaatsiaat tassaammata Kalaallit Nunaanni nunasisut siullersaat, naggueqatigiillu Inuit nuna ukiut hunnorujullit kingorna aatsaat tikissimagaat.
- Kikkut sivisunerpaamik Kalaallit Nunaanniissimanersut pineqarpat, taava danskit qallunaatsiaanit kingoqqisuusut naggueqatigiinnit Inunnit nunaqavissuunerussapput, Thorkild Kjærgaard taama allappoq.
Taanna isumaqarpoq ullumikkut pissutsit taama inissisimatillugit inuiannik taakkunannga marlunnit kingoqqisut tamarmik inissaqartinneqanngitsut.
AAMMA ATUARUK Allaatigisaq: Kalaallit Nunaat ilumut nunasiaataasimavoq
Namminersornerullutik Oqartussat maannalu Namminersorlutik Oqartussat ”inuiaqatigiit kalaallit tamanut ilaqutaasussamik nuannaarutaasussamillu ineriartortinnissaannut atorneqarsimanngillat, inuiaassutsimulli tunngasumik 'kalaallinngorsaanissamut' atorneqarsimallutik”, Kjærgaard taama allappoq.
Tamannalu kusanaatsuliorneruvoq. Inuiaqatigiinnimi kalaallini ingerlanerliortoqarpoq - meeqqat atuarfiannit pisortat missingersuutaanik qaangiinermut.
Taamaammat Folketingip Kalaallit Nunaanni namminersornermik aaqqissuussineq atorunnaarsittariaqarpaa, soorlu aamma naalagaaffik kommunimut piginnaatitsissummik utertitsisinnaasoq, kommunip sulissani naammassisinnaanngippagit.
AAMMA ATUARUK Kim Leine: Kjærgaardip tunngavilersuutai isumaqatiginngilakka
Taamaaliortoqanngippat Kalaallit Nunaanni innuttaasunut suli ajornerusumik kinguneqartussaassaaq, Kjærgaard taama isumaqarpoq.
- Ukiuni hunnorujulippassuarni nunaqqatigaagut (…), ingerlanerliortoqaannassappallu taakku pilliutigineqassapput, oqaluttuarisaanermik ilisimatusartoq taama allappoq.
