Allaatigisaq: Kalaallit Nunaat ilumut nunasiaataasimavoq

Oqaluttuarisaanermik Ilisimatusarfimmi Københavnillu Universitetiani ilisimatusarsimasut marluk Danmarkimi aviisimi Jyllands-Postenimi allaatigisaminni oqaatigaat Kalaallit Nunaat Danmarkip nunasiaatigisimagaa.

Inuiaat piorsarsimassusaannut oqaluttuarisaanerallu pillugit Ilisimatusarfimmi Ph.D.-nngorsimasup Inge Høst Seidingip, Søren Rudilu Københavnip Universitetiani oqaluttuarisaanermik Ph.D.-nngornikup, Jyllands-Postenimi ullumi taama allaatigisaqarput.

AAMMA ATUARUK Kim Leine: Kjærgaardip tunngavilersuutai isumaqatiginngilakka

Danmarkimi oqartussat kalaallinut naleqqiullugu qaffatsitaasimasutut pissusilersorlutillu qanoq iliuuseqarsimanerisa takutippaat Kalaallit Nunaat Danmarkimit nunasiaatitigineqartutut 1953 tikillugu isigineqartoq, Inge Høst Seidingip Søren Rudillu oqaatigaat.

Kalaallit Nunaat nunasiaataasimanersoq nunasiaataasimannginnersorluunniit pillugu oqallinneq oqaluttuarisaanermik ilisimatusarsimasumit Thorkild Kjærgaardimit Ilisimatusarfimmeersumit aallartinneqarpoq.
Taassuma Saammaasseqatigiinnissamut Ataatsimiititaliaq isornartorsiorpaa, taannami isumaqarpoq Kalaallit Nunaat nunasiaataasimanngitsoq. Aviisip Politikeni aaqqissuisuunerata Bo Lidegaardip aamma oqaatigaa Kalaallit Nunaat nunasiaataasimanngitsoq.

AAMMA ATUARUK Ilisimatusarfimmi Lektori: Saammaateqatigiinnissamut isumalioqatigiissitaq "tissisaarutaannaavoq"