Naalakkersuisoq Tiliup isornartorsiuineranut: Nammineq aamma akisussaaqataavoq
![](/sites/default/files/styles/image_934x467/public/2024-01/Aqqaluaq%20B.%20Egede%20om%20samr%C3%A5d.jpg?itok=X0BDqdEk)
Inuit innarluutillit tapersersorneqarnissaannut inatsisissatut siunnersuutip Naalakkersuisut apriilimi tusarniaassutigiligaannut akissuteqarnissamut ippassaq pingasunngornermi periarfissaq kingulliuvoq.
Inatsisissatut siunnersuut taanna isornartorsiorneqangaatsiarpoq – aamma nunatsinni inuit innarluutillit pillugit oqaaseqartartumit. Inatsisissatummi siunnersuut pakatsinaqisoq allannguuteqangaanngitsorlu, taanna isumaqarpoq.
Inatsissatullu siunnersuummut tusarniaassutigineqarunnaaqqammersumut akisussaasuusoq, inatsisissatut siunnersuutip isornartorsiorneqarneranut tunngatillugu maanna oqaaseqarpoq.
Isornartorsiorneqarnerami paasisinnaagini nunatsinnilu inunnik innarluutilinnik sullissinerup pitsaanerulernissaanut iliuuseqartoqarnerusariaqartoq, Aqqaluaq B. Egedep miserratiginngilaa:
- Tassa naalakkersuisutut maluginiarpara, Tiliup tungaaninngaanniit sakkortuumik qisuariaateqartoqartoq. Iluaalliuutigisaqarsimaguni aamma paasisinnaavara, nunatsinni innarluutillit atugaannik ullumikkut kivitsiniarnerput sanngiiffeqarami annertuumik.
Tilioq aamma akisussaaqataasoq
Aqqaluaq B. Egedelli paasinninnera tamaanga killippoq. Aammali isumasioqatigiinnerni peqataasarsimalluni, ineqarfinni pulaartarsimalluni ataatsimeeqateqaqattaarsimallunilu oqarpoq.
Taamaammallu Tilioq inatsisissatut siunnersuutip imarisaanut aamma akisussaaqataasoq, taanna isumaqarpoq:
- Taamaammat taanna pilersinneqassappat, Tiliup aamma pingaarnersiuinissaa qanorlu neleqarnissaanik taggissinissaa pisariaqartipparput, taanna oqarpoq nangillunilu.
- Suliarisinnaanngippassuk uagut naalakkersuisoqarfitsinninngaanniit aamma inassuteqarsinnaavugut pilersitsinissat assigiinngitsut tulleriiaarneqariarpata aningaasatigut qanoq kinguneqarumaarnissaa.
Tiliummi naalakkersuisut inunnut pineqartunut, tassa inunnik innarluutilinnik sullissinermik sulialinnut inunnullu innarluutilinnut tusarnaarluarsimannginnerat isornartorsiuinerminut pingaarnertut tunngavilersuutigaa.
Tiliormi kisiat tusarnaarluanngilaat, nunatsinnimi inuit innarluutillit tusarnaarluanngisaannut aamma ilaapput. Tamannalu ajorluinnarpoq, nunatsinni inuit innarluutillit pillugit oqaaseqartartoq Anja Hynne Nielsen isumaqarpoq.
- Soorunami malinnaaffigivarput sineriammi innarluutillit ataasiakkaat massuaateqarnerat aamma paasinaqqissaarpoq, ukiorpanni inooriaasitsinniilersimasoq aaqqiivigineqassappata nalunngittariaqarparput ukiumiit ukiumut ingerlaannarnata, ukiuni tullerni qulini innarluutillit atugaatigut pitsaaliuiniarnerput qanoq ineriartortissanerlugu, Aqqaluaq B. Egede oqarpoq.
Nunat tamalaat isumaqatigiissutaannik naammassinninngitsoq
Inatsisissatut siunnersuut, naalakkersuisut aallartitaat nunatsinni inunnik innarluutilinnik sullisseriaatsimik Naalagaaffiit Peqatigiinni nassuiaallutillu illersuineranniit sapaatit akunnera qaangiutinngitsorluunniit, tusarniaassutigineqarunnaarpoq.
Taamanna nunatsinni inuit innarluutillit pillugit oqaaseqartartup aamma isornartorsiorpaa. Nunarpummi nunat tamalaat isumaqatigiissutaannik isumaqatigiissumik naalakkersuisut atsiornikuusaannik naammassinninngitsoq, Tilioq aamma Inuit Pisinnaatitaaffii pillugit Kalaallit Nunaanni Siunnersuisoqatigiit isumaqarput.
Aqqaluaq B. Egedep tamanna tusaatissatut tiguinnarpaa:
- Tassa siullermik soorunami nunatsinni innarluutilittatta aamma pisinnaatitaaffii naapertorlugit, nunat tamalaat akornanni isumaqatigiissutinut qanillattornissarput siunertaavoq, taavalu aamma nunatsinni innarluutillit pillugit atugassarititaasutigut.
Nuna isorartooq - aporfippassualik
Nunatta isorartunerujussua nunatta nunat tamalaat isumaqatigiissutaannik naammassinninniaaluusaarneranut pissutaaqataalluinnartunut ilaasoq, Aqqaluaq B. Egedep nassuiaatigaa.
Tassa nunatta isorartunerujussua pissutaalluni angallannikkut pissutsit ilungersunarsinnaasarnerat isumaqatigiissutinik naammassinninnissamut aporfiusartut oqaatigaa:
- Tassa ilumoortortaqarsinnaavoq, patsisigalugu nunatsinni innarluutillit pillugit suliniarnerput annertuumik suli kinguaattooqqasutut oqaatigineqarsinnaavoq, suliassaqarujussuarpugut. Aamma angallannikkut pissutsit inoqarfimmiit inoqarfimmut atukkat assigiinngerujussuartarneri, nunaqarfinni illoqarfinni mikinerni illoqarfinnilu anginerni innarluutilittatsinnut atugassarititaasut nikingasorujussuusinnaapput, taamaammat ilaatigut nunanut allanut sanillersuussisinnaanerput amerlasuutigut aamma killeqarpoq.
- Inatsisiliornikkut aamma malinnaatitsinissarput pisariaqarpoq. Periarnermi siullermi tamaasa naammassisinnaanngilagut, kisianni tassa aqqusineq pilersinniagarput unaavoq pitsaanerusup tungaanut aamma inatsisitigut ineriartortitsilernissarput taanna pisariaqartoq. Taakkua piuppata aamma aningaasaqarnikkut pingaarnersiuinerit erseqqinnerusut pisariaqartippavut.
Tassa Tilioq aamma akisussaaqataasoq, Aqqaluaq B. Egedep uteqqippaa:
- Ukiumiit ukiumut ingerlaniarneq ajornartorujussuuvoq, taamaammat ukiunut amerlasuunut isumaqatigiissusiorluta suleqatigiiffissatsinnik pilersaarusioqatigiinnissarput maannakkut naalakkersuisut sinnerlugit uanga susassaqartutut anguniarlugu suliassama aallartinnissaanut. Tassa Tilioq peqqunikuuara aningaasanik pingaarnersiueqqullugu iliuusisatsinnillu suliassatsinnik tulleriiaarinermik siunnersuusioqqullugu.