Innuttaasup siunnersuutaa isumaqatigaat: Naluttarfik Malik nutartertinnagu allineqarli

Naluttarfiup Maliup nutarterneqarnerani ukiup ataatsip tungaanut matoqqanissaa pilersaarutaavoq. Innuttaasulli nutarterinnginnermi allileeqqusipput siunnersuullu politikkikkut isummerfigineqartussanngorpoq.

Allattoq Thor Bill

marsip 25-at 2024 07:37

Nutserisoq Alice Sørensen

Nuummi Naluttarfik Malimmi nalunnermik ilinniartitsinerit, sarpartaannerit nipaatsumilu nalunnguaarnerit periarfissaajunnaarallarsinnaapput.

Naluttarfik Malik 30 millionit koruunit nalinginut nutarterneqalerpat ukiup ataatsip tungaanut matoqqatinneqassaaq. Kommuneqarfik Sermersuumi kommunalbestyrelsi ukioq kingulleq taama aalajangerpoq.

Taamaliortoqannginnissaalu Jan Tengstedtip angorusuppaa.

Nutarterinerummi nalaani atorneqaannarsinnaanera anguniarlugu, pilersaarutaasumik matuneqannginnerani allilerneqarnissaanik Jan Tengstedt innuttaasutut siunnersuuteqarpoq. Siunnersuutaalu Nuummi isumaqatigineqaqaaq.

- Siunnersuutip politikkikkut isummerfigineqarnissaanut atsiornerit 250-it piumasaqaataasut, siunnersuuteqarninnit akunnerit 15-iinnaat ingerlaneranni pissarsiarineqarput. Siunnersuutip taamarsuaq isumaqataaffigineqarsimaneranik allamik eqqaamasaqanngilanga, taamaammat uattulli kissaateqartoqarsimassaaq, Jan Tengstedt oqarpoq.

Maliup saniani naluttarfimmik allamik sanasoqarnissaa taakkulu gangimik glassiusumik atassuseqarneqarnissaat siunnersuutigineqarpoq. Naluttarfimmi nutaami nunani tamalaani naluttarfinni takissutsit atorneqartartut assinganik sanasoqarneratigut, unammiuaarnernut annerusunut takornarianullu annertunerusumik periarfissaqalernissaa siunertaavoq.

INNUTTAASUT SIUNNERSUUTAAT IMA PINEQARTARPUT

Kommuneqarfik Sermersuumi innuttaasut siunnersuutaat isumaqataaffigineqarluartut politikkikkut suliassanngortinneqarsinnaapput.

Nuummi innuttaasup siunnersuutaa kommunalbestyrelsemut ingerlateqqinneqassappat ullut 90-it qaangiutsinnagit atsiornerit 250-it pissarsiarineqarsimassapput. Siunnersuutit kommunimi najukkami allami pineqartillugit atsiornerit 50-it katersorneqarsimassapput.

Innuttaasulli siunnersuutaat akuerineqartinnagit piumasaqaatit aalajangersimasut naammassineqarsimassapput. Siunnersuuteqartup inuttut soqutigisai aallaaviginagit innuttaasulli soqutigisaat ilaatigut siunnersuummi aallaavigineqassapput.

Tusarfik: Kommuneqarfik Sermersooq

Allisiguk

Katersuuffik sunngiffimmilu ornittagaq peqqinnartoq

Alliliisoqanngippat allatulluunniit aaqqiisoqanngippat naluttarfiup sivisunerusumik matuneqarnerata innuttaasunut annertuumik kinguneqarnissaa Jan Tengstedtip aamma aarleqqutigaa.

- Inuusuttorpassuit naluttarfimmiittarput, naluttartullu klubbiat sapaatit akunneranut pingasut-sisamariarluni nalutitsisarpoq. Taakkulu naluttarfimmik atuinertik unitsiinnarsinnaanngilaat, taamaattoqassappammi ajussaqaaq. taanna oqarpoq.

Naluttarfiup ukiumi ataatsimi matoqqanissaata ernumanartoqarnera, Kalaallit Nunaani naluttartut nuna tamakkerlugu sungiusaasuata Jonas Tetzschnerip oqaatigereerpaa. Matusineq naluttartut klubbiata nalunnermillu kulturip ukiuni aggersuni ajorseriarnissaanik kinguneqarsinnaasoraa.

- Meeqqat ilaasortanngoqqinnissaat kajumissutsimillu ukiuuttartut sulileqqinnissaat neriorsuutigineqarsinnaanngilaq. Ataatsimoorfiit allat immaqa timersornermut tunngassuteqanngitsut ujartulissavaat. Tamanna inuiaqatigiinnut ajussaaq, taanna KNR-imut novembarimi taama oqaaseqarpoq.

Pisariaqartitsineq annertusiartortoq

Jan Tengstedt naapertorlugu Naluttarfik Malik inunnik 167.000-nik ukiumut atuisoqarpoq. Pisariaqartitsinerlu ukiut ingerlaneranni annertusiartuinnartoq taanna isumaqarpoq.

- Taamani naluttarfik sananeqarmat Nuummi innuttaasut 12.000-uvugut, innuttaasullu maanna 20.000-it sinnerlugit amerlassuseqarput illoqarfillu suli ineriartorluni. Atuisut taama amerlatigitillugit aningaasaliiviginissaa tulluartuusoraara, taanna oqarpoq.

Pisariaqartitsineq annertummat aaqqiissummik nassaartoqartinnagu naluttarfiup matuneqarnissaata periarfisssaannginnera, kommunimit paasineqarumaartoq taassuma neriuutigaa.

- Siunnersuutip ilassilluarneqarnissaa, naluttarfiullu allineqarnissaanik suliniutip aningaasaliivigineqarlunilu ingerlateqqinneqarnissaa neriuutigilluinnarpara.

Suliniummullu aningaasaliissutissat kommunip karsianit nassaariniarneqartariaqanngitsut taassuma tikkuarpaa. Assersuutigalugumi aningaasaateqarfinnut qinnutigineqarsinnaasorai.

NALUTTARFIUP ALLINEQARNISSAANUT SIUNNERSUUT

Suliassaq siulleq: Naluttarfiup saniani naluttarfik 2.300 m²-iusoq sananeqassaaq, taannalu atisaajartarfimmit pioreersumit naluttarfimmiillu gangi glassiusoq kiassagaq aqqutigalugu iserfigineqarsinnaassalluni. Taamaalilluni atisaajartarfiit uffarfiillu pioreersut atorneqarsinnaallutik.

Naluttarfik 20x50-meteriusoq arfineq-pingasunik banelik 1,4 meterinillu itissusilik sananeqassaaq, iikkallu kujammut sammisortaani isiginnaarianut inissaliortoqarluni.

Suliassat aappaat: Malik nutarterneqassaaq.

Suliassat pingajuat: Pinnguartarfik pioreersoq sanaartukap saavani umiarsualimmut sammisumi sananeqaqqissaaq.

Suliassat sisamaat: Biilinut unittarfimmiit Maliup tunuatungaaniit isaarialimmik, nutaanik atisaajartarfiliortoqassaaq uffarfiliortoqarlunilu.

Unammiuaartoqartillugu isiginnaariat kioskimut kissartorsiniarsinnaassapput aamma perusuersartarfinnut isaariap eqqaaniittunukarsinnaassapput.

Allisiguk

Ataatsimiititaliap siulittaasua: Siunnersuutitsialak

Innuttaasut nalunnermik nuannarisallit kisimik siunnersuummut isumaqataanngillat. Kommuneqarfik Sermersuumi Illoqarfimmut Ineriartortitsinermut Sanaartornermullu Ataatsimiititaliap siulittaasuata Justus Hansenip (Demokraatit) aamma siunnersuut torragaa.

- Isumassarsiatsialaavoq, siunnersuut torrallunilu naluttarfimmut eqqaanullu tulluartuusoq titartakkani takusinnaavara. Nalunnermi periarfissanik atorluaaneruvoq, uangami ilaquttakkalu periarfissat taakku aamma atorluartarpavut, taanna oqarpoq.

Taannali siunnersuutip aningaasartaanut isummerusunngikkallarpoq. Maliup nutarterneqarnissaanut maanna pilersaarutaasup qanoq akeqarnissaa Justus Hansenip paaseqqaarusuppaa.

Naluttarfiup nutarterneqarnerani nalunnissamut periarfissaqaannarnissap sulissutiginissaa, ataatsimiititaliap siulittaasuata oqaatigereerpaa. Alliliinerlu periarfissaasinnaanerarpaa.

- Imaalluarsinnaavoq. Naluttarfiup saniani boblebadiliortoqarsinnaanera aamma eqqartorneqareerpoq, tamanna sanaartornissamit akikinnerungaatsiarpoq. Kisianni siunertaa aningaasaqarniarnerlugu ataqatigiissinnaappata, tamatuma sulissutiginissaa aamma peqataaffigerusuppara, Justus Hansen oqarpoq.