Nalunaq neriulluarpoq
Amigartooruteqarneq missingersuutini takuneqarsinnaagaluartoq taamaattoq Nanortallip eqqaani kuultisiorfik, Nalunaq Gold Mine, neriulluartoq malunnarpoq. Suliffeqarfik 52 millioni koruuninik amigartoorpoq, ingerlatsinerli maanna sinneqartoorfiulerpoq. Nalunaq aamma nalunaarpoq kuultimik akuinnerusumik maanna nassaassaqarnerulerlutik. Nalunap ukiumoortumik nalunaarusiaani tamanna takuneqarsinnaavoq.
Nioqqutissiorneq imminut suli akilersinnaanerulersinniarlugu Nalunaq Gold Mine maanna aalajangerpoq, aatsitassanik usilersuisarnertik Spaniamiit Canadamut nuunniarlugu. Nalunaq Gold Mine Paggivittammi ujaqqanik piiaavimmik pisisimavoq – Canadamullu umiarsuarmik angalaneq Spaniamukarnermiit qaninneroqimmat ingerlatsinermi millioni koruunerpassuit sipaarneqarsinnaassasut ilimagineqarpoq.
Ujaqqat piiakkat 123.000 tonsit Kalaallit Nunaanniit Nalunaq Gold Mine-p siorna assartorsimavai – kingullermik naatsorsuiffimmiit 30 procentimik annertunerusut. Kalaallit Nunaanni ujaqqat piiakkat 1 tonsiugaangata kuulti 19 grammi pissarsiarineqartarpoq.
