Nalunami ajunaarneq misissorluarneqarpoq

Aatsitassanut ikummatissanullu pisortaqarfiup Nalunami kuultisiortoqarnerani toqusoqarneranut atatillugu misissuinermini, ajutoornerinnaq kisiat misissunngilaa.

- Ajutoorneq soorunami misissugassatut salliuvoq, kisianni taassuma saniatigut allarpassuarnik aamma misissugassaqarpoq, Aatsitassanut pisortaqarfimmi immikkoortortaqarfiup pisortaa Jørn Skov Nielsen oqarpoq.

- Soorlu assersuutigalugu, aningaasatigut pissai sinneruttut pissusissamisoornersut misissugassaraavut. Qanoq sivisutigisumik Kalaallit Nunaanniittussaasimanersoq, maaniinnera sivitsortussaasimanersoq. Ullormut qanoq sivisutigisumik sulisartussaasimanera Suliffiullu avataatigut qiimmassaatigalugu sukisaarsariartarsimanera aamma misissortussaallutigu, Aatsitassanut pisortaqarfimmiit Jørn Skov Nielsen oqarpoq.

Taanna aperaarput, tamakku tamarmik isumannaallisaaneq pillugu misissorneqartartussatut aalajangigaasimanersut.

- Tassami taamaappoq, qullersaqarfimmiimmi pisussaaffivut isumannaartussaavavut, aammalumi guldtisiorfiup isumannaallisaanikkut ileqqussarititaasut assigiinngitsut isumannaagassarisai, soorlu; isumannaallisaanikkut ataatsimiititaliaqarnersoq, isumaannaallisaaneq pillugu ataatsimiisitsisoqartarnersoq, upalungaarsimanissamullu sungiusarnerit pisarnersut, tapullugit misissugassaraavut. Imaassinnaammammi, ajunaartoqarnerata nalaani, isumannaallisaanikkut sinaakkutassat tamakkua uniorlugit pisoqarsimanera patsisaalluni ajunaartoqarsimasinnaasoq, Jørn Skov Nielsen oqarpoq.

Taannattaaq naggasiivoq, misissuinerup nalaani pisumik allanngortitsisoqannginnissaa pingaartuusoq.

Aatsitassanut ikummatissanullu pisortaqarfiup suliffigissaasullu ajunaartoqarneranik misissuinertik sapaatip-akunnera suli ingerlakkallassavaat.