Nalunaaquttap ingerlaqatigiiffia Siumumit allanngorteqqikkusunneqartoq

Nunatsinni nalunaaquttat ingerlaaqatigiiffiisa allanngortinneqarneraniit tassa UTC-3-miit UTC-2-mut nuunneraniit ukioq ataasiinnaq qaangiutingajalerpoq.

Kisianni nalunaaquttat ingerlaaqatigiiffiisa UTC-3-mut utertinneqarnissaat Siumumit kissaatigineqarpoq.

Taamaammat naalakkersuisoqatigiinni partiip tamanna pillugu inatsisissamut siunnersuutini tusarniutigaa.

- Tamatuma kingorna paasinarsivoq innuttaasut amerlasuut nalunaaquttat ingerlaqatigiiffiat nutaaq ajornartorsiuteqarfiusut misigisaraat, siunnersuummi tusarniutigineqartumi allaqqavoq.

Niuernikkut Danmarkimut Europamullu iluaqutaasussatut kissaatigineqarluni nalunaaquttap ingerlaaqatigiiffiisa allanngortinneqarnissaat 2022-imi taaguussisoqarmat Siumut akuerseqataagaluarpoq, maannali isumaqataajunnaarlutik, Karl Tobiassenip oqaatigaa.

- Ilumoorpoq, taasinermi akuersinikuuvugut aamma taamanikkut isumaqarnikuuvugut aasakkut nalunaaqutaq nikisinneqartassanngitsoq. Kingullermik nalunaaqutaq nikisinneqarmat, seqineq malikkunnaarnikuuarput ulloqeqqartarpoq seqineq qullarnerpaaffissani nallinngikkaa, tassa akunnerit marluk missaani nikingalernikuuvoq. Taamaammat siusinnerusukkut sungiusimaneqartumut nalunaaquttap utertinneqarnissaa taanna siunnersuutigivarput, Karl Tobiassen (S) oqarpoq.

Nalunaaquttap allanngornerata klinguneranik Karl Tobiassen innuttaasut ilaanniit saaffigineqartarsimalluni KNR-imut oqaatigaa. Assi © : Johannes Olsen

Inoqatinut attaveqaatitigut ilisimaneqarluartup Qupanuk Olsenip nalunaaquttap kingumut uterteqqinneqarnissaanik atsiornernik upernaaq manna katersivoq. Atsiornernillu katersinermini inuit 2.700-t missaannittut atsiorneri naalakkersuisunut tunniuppai.

Nalunaaquttap siorna allanngortinneqarnera inuit ilaannit nuannaarutigineqarpoq. Taakkua ilagaat timersortartut ullukkut qaamanerusalernissaanik nuannaaruteqartut.

Kisianni nalunaaquttap allanngortinneqarneranut inuit isornartorsiuisut Siumumit tusaaneqarusunnerupput.

- Soorunami inummiit inummut nalilersuinerat assigiinngillat aamma taakkua ataqqivagut. Aamma qanoq ikkaluarpalluunniit taamaattoqartuartussaavoq, kisianni uani amerlasuut anngussuinerat aallaavigalugu taamatut siunnersuummik ingerlatsivugut, taanna oqarpoq.

Aasap nalunaaqutaata atorunnaarsinneqarnissaa ilanngullugu kissaatigigaat

Siumut nalunaaquttap ingerlaarnerata kingumut utertinneqarnissaata saniatigut aamma allamik kissaateqarpoq. Aasammi nalunaaqutaata atorunnaarsinneqarnissaa ilanngullugu kissaatigaa.

Taanna aatsaat Isumassarsiarineqalinngilaq.

Nunatsinni aasap nalunaaqutaata atorunnaarsinneqarnissaa, Inatsisartut 2019-imi upernaakkut ataatsimiinnerminni akuersissutigaat.

EU-mili aasap nalunaaqutaanik atorunnaarsitsinissaq utaqqineqarmat, nunatsinni aasap nalunaaqutaa suli atorunnaarsinneqanngilaq.

Utaqqiinnartoqarunnaartariaqartorli, Karl Tobiassen isumaqarpoq.

-Tassa 2019-imi siunnersuutitsitut nalunaaqutaq ingerlalissasoq kisianni EU-mi nikisitsisoqanngimmat, uagut taanna utaqqinagu aaqqiisoqassasoq siunnersuutigaarput, Karl Tobiassen oqarpoq.

Siunnersuutigineqartoq akuerineqassappat oktoberip 27-ani atuutilissaaq, taavalu ukiuugaluarpat, aasaagaluarpallu allanngorteqqinneqassanani. 

Tassalu ulloq taanna nalunaaqutaq 24:00 nalunaaqutaq akunnernik marlunnik, tassalu 22:00-imut, kinguartinneqassaaq, 

Allatut aalajangiisoqartinnagu, nalunaaquttap ingerlaaqatigiiffiisa allanngornerat juunip naanerani nalilersorneqassasoq, naalakkersuisut siulittaasuata Muté B. Egedep Sermitsiamut oqaatigaa.