Naleqqap qinigassanngortitassani piareerai
Partiit allattoqarfianni maanna qineqqusaarnissat qineqqusaarutissallu ulapputigineqaleruttorput, taakkuli saniatigut partiini arlalinni kikkut qineqqusaarnissaat naammassiartuaarneqarlutik.
Hans Enoksen
Allattoq Nauja Møller
oktobarip 09-at 2014 08:37
Partiilu anginngitsoq ataaseq partiinik allanik piareersaatimini siuttuugallarpoq.
Qinersinissap suaarutigineqarneraniit sapaatip akunnera ingerlareersorlu novembarip 28-ni qinersinissap tungaanut, partiini pilersinneqarsimasuni kingullerpaap Partii Naleqqap piareersarnerni siuttuugallarput.
Partii Naleqqami allattaaneq, Per Rosing Petersen KNR-mut paasissutissiivoq, qineqqusaarusuttut 23-it allassimasuutiminniilersut. Partiillu qineqqusaartussanut allattorsimaffimmut ilanngunnissamut killiliussaa oktobarip 17-ta tungaanut amerleratarsinnaasut oqaatigalugu.
Qineqqusaarusuttut affaasa Partii Naleqqap piumasaqaatigisaasa pingaarutilik malippaat, qineqqusaarnissarlu qulakkeeqqallugu. Partiimiit piumasaqaatigineqartoq tassaavoq sassartoq inatsisartunut ilaasortanngorsinnaanersoq, tamannalu pinerlussimannginnermut uppernarsaammik tunniussinerminni qulakkeerneqassaaq.
Partiini pisoqalisuni allatorluinnaq isikkoqarpoq. Siumut, Inuit Ataqatigiit, Atassut Demokratillu oqaatigisinnaanngilaat qineqqusaartussat amerlassusissaat.
Qineqqusaartussat qaammat qaangiuppat kingusinnerpaamik nalunaarutigineqarsinnaanerat, partiinullu sineriammi immikkoortortaqarfippassut qineqqusaartussanik qullersaqarfimminnut nalunaarutiginninnissaasa, qassit qineqqusaassanersut oqaatigineqarsinnaannginnerannut peqquteqarput. Siumup allattoqarfiatalu KNR-mut nalunaarutigaa, partiip qineqqusaartussanut iluminni kingusinnerpaamik sapaatip akunnera qaangiuppat oktobarip 19-ni nalunaarutigereersimassagaat.
Novembarip arfineq aappaata missaani, partiini tamani kikkut qinigassanngortissanersut qinersisartutut ilisimalersinnaavatit.
