Politimesteri Nakuusertarnerup ajornartorsiutaanera unammillernarpoq

Nakuusertarnerit pillugit nalunaarutigineqartut ikileriarsiagaluartut, nakuusertarnerit sulil amerlavallaarput,. Nakuusernerit amerlanerit tassanngaannaq pisarput taamaattumillu pinaveersaartinniarnerat ajornakusoorluni, politimesteri oqarpoq.
Allattoq Merete Lindstrøm, Marie Kûitse Kristensen
februaarip 22-at 2019 12:28

2017-imi nakuusersimasutut unnerluutigineqartut amerlasoorujuupput ukiorli kingulleq unnerluutigineqarsimasut ikinnerulerlutik. Taamaakkaluartoq sanilitsinnut kisitsisit sanilliutissagaanni suli qaffasippallaartut politimesteri isumaqarpoq.

Ukioq kingulleq nakuusersimasutut unnerluutigineqartut 701-iupput, siornaak qaffasinnerungaatsiarlutik 854-iullutik.

Taakkuali amerlavallaartut politimesteri Bjørn Tegner Bay oqarpoq, - nunatsinni nakuusertarnerit ima amerlatigipput nuannaarutissaanngilluinnarlutik.

Innuttaasut 1000-iugaangata taakkunannga 13-it nakuusersimasutut unnerluussaasartut kisitsisit 2018-imeersut takutippaat.

Danmarkimi inuit 1000-ugaangata tallimat nakuusersimasutut, Savalimmiunilu inuit 1000-iugaangata 1,6-it nakuusersimasutut unnerluutigineqartarlutik.

Taamaammat nunatsinni suli suliassaqangaatsiartugut Bjørn Tegner Bay isumaqarpoq.

Pinaveersaartinneqarniarnerat ajornartorsiutaavoq

Taassuma ilanngullugu oqaatiga pinaveersaartitsinermik suliaqartut, pisortat suliffeqarfii, atuarfeqarfiillu qanimut suleqatigineqartut, taamaakkaluartorli: - uaguttaaq nassuerutigissavarput nakuusertarnerup ajornartorsiutaanera unammillernarigatsigu, politimesteri oqarpoq.

Politimesterip oqarnera naapertorlugu nakuusertarnerup pinaveersaartinniarneqarnera politiinut unammillernarsinnaasarmat.

 - Misilittakkagut aallaavigalugit oqassaguma, nakuusertarnerit imigassartorpallaartoqarsimatillugu nakuusertoqarnerukkajuttarmat, Kalaallit Nunaanni politimesteri Bjørn Tegner Bay taama oqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk