NAKUUSA-mi meeqqat inuusuttuaqqallu ataatsimeersuaqqammertut
NAKUUSAP meeqqanut isummersuisarfiani peqataasut oqariartuutinik siunnersuutinillu suliaqarput. Taakkua inersimasunut saqummiunneqartussaapput, isumaqatigiissutit arfinilinnik immikkoortortaqartut alajangiiffigineqarlutik.
Meeqqat atugaat pillugit inuiaqatigiinni oqallittoqarnerani peqataarusupput peroriartornerminnilu atugassarititaasut qanoq pitsaanerusinnaanersut oqallisigerusuppaat.
AAMMA ATUARUK Meeqqat isummaminnik annissisinnaasariaqarput
Oqallisissaqaqaarlu. Nakuusami suliniutinut aqutsisup Najaaraq Møllerip eqqaavaa soqutiginartorujussuit annertuullu meeqqat oqallinnerminini oqaluuserisimagaat.
Nakuusap meeqqanut isummersuisarfiani peqataasut, atuarfinni tamani inunnik isumaginninnermut siunnersorteqalernissaa kissaatigaat.
Avannaata Kommuniani atuarfinni inunnik isumaginninnermut siunnersortinik atorfeqartitsinermik misilittagaqarluarput.
Avannaata Kommuniani Ilullissani, Atuarfik Jørgen Brønlundimi aamma Mathias Storchimi, inunnik isumaginninnermut siunnersortinik marlunnik atorfinititsisoqarpoq, atuartut saaffigisinnaasaannik.
AAMMA ATUARUK - Sulerisimanersusi takusinnaanngilarput
Avannaata Kommuniani kommunalbestyrelse oktoberip qaammataani aalajangerpoq, meeqqat atuarfiini Uummannami Upernavimmi, Kullorsuarmi Qaanaami inunnik isumaginninnermut siunnersortit atorfiinik pilersititsisoqassasoq.
- Upperigatsigu isumaginninnermi siunnersortit atuarfinni sulilersinnerisigut annertuumik kivitsisoqarumaartoq, Avannaata Kommuniani ilinniarneq pillugu ataatsimiititaliami siulittaasoq Jens Kristian Therkelsen oqarpoq.
NAKUUSA-mi meeqqat aamma kissaatigivaat, meeqqat atuarfiini ilinniartitsisut aamma inunnik isumaginninnermut siunnersortit atuarfinni sulisut, perorsaanermut aamma tarnip pissussai pillugit ukiut tallimakkaarlugit pikkorissartinneqartassasut.
AAMMA ATUARUK Peqqinnissaq inuunerissaarnerlu Meeqqat Isummersorfiisa ukkataritikkusukkaat
Pipaluk Petersen nassuiaavoq, meeqqat atuarfiini atuartut perorsagaalluanngitsutut naatsorsuutigineqartut amerlavallaartut tamannalu kukkunerusoq taana isumaqarpoq.
Pipaluk Petersen Nakuusami meeqqat isummersorfianeersoq taama oqarpoq. Meeqqat ataatsimeersuarnerminni aaliangersagaliaat Meeqqat Pisinnaatitaaffiisa novembarip ulluisa 20-anni 30-liinerini Meeqqat Isummersorfiinit borgmesterinut naalakkersuisunullu tunniunneqassaaq.
Aalajangersakkat meeqqat nunat avannarlerneersut januarimi ataatsimeersuarneranni aamma atorneqassaaq.
