Nakuusa: Meeqqat isummaminnik annissisinnaasariaqarput
NAKUUSA-p Naalakkersuisoqarfiit, kommunit tamaasa, MIO, meeqqallu isummersorfinni assigiinngitsuni ilaasortaasut ataatsimeersuarnissamut aggersarpai.
NAKUUSA-p meeqqat tusaaneqarnissamut pisinnaatitaaffiat pitsaasumik ulloq manna tikillugu suliniutigiuartarpaa, soorlumi maanna kommunit tamarmik NAKUUSAmut suleqatigiinnissamut isumaqatigiissummik atsiorsimasut.
Meeqqat ukiut tamaasa ataatsimeersuartinneqartarput taakkulu isumaat Naalakkersuisunut apuunneqartarput.
- Meeqqat inuiaqatigiinnut akuutinneqarnissaannut pisinnaatitaaffiat isumasioqatigiinnermi sammineqarpoq, tassanilu meeqqat oqaaseqaraangata inersimasuninngaanniit tusaaniarneqartarnissaat. Taava taanna siunissami qulakkeerumallugu, suli qulakkeernerujumallugu ullumi isumasioqatigiissitsivugut, taannalu amerlasuunit peqataaffigineqarluni, NAKUUSA-mi suliamik aqutsisoq Najaaraq Møller oqarpoq, nangillunilu:
- Ullaarli ingerlagatta nuannersorujussuuvoq, pingaartumik Kommuneqarfik Sermersuumi inuusuttut kommunalpolitikerii saqqummiipput, NAKUUSA-milu ukiorpassuarni ilaasortaanikut ilaat saqqummiisunut aamma ilaalluni. Taakku soqutigineqartorujussuupput, Najaaraq Møller oqarpoq.
2016-imi nunat tamalaat Naalagaaffiit Peqatigiit Meeqqat Pillugit Ataatsimiititaliaanut nunarput soraarummeeqataammat, NAKUUSAp Meeqqat Isummersorfiat nalunaarusiortinneqarpoq, kiisalu ukiormanna meeqqat ataatsimeersuarnermi aalajangersagaat Naalakkersuisunut, Inatsisartunut kommuuninilu politikerinut tunniuppaat.
