VIDEO Nunatsinni uummalluutaasartut nakorsat isumasioqatigiissutigigaat
Niels Lyberth uummalluttuujuaannarsimavoq aammalu qaratsami taqaasigut milikartoortarsimalluni. Oqaluttuartoq qulaani isiginnaarsinnaavat.
Nakorsat sinerissamit tamaneersut uummatikkut nappaatit tamaasa pillugit ilisimasanik nutaanik pissarsiniarlutik Nuummi katersuuteqqammerput.
- Ajoqusersimasunut nakorsiartarfimmi nukingernartumik pisoqartillugu sukkanerusumik qanoq-ilioriarnissatsinnut iluaqutigisinnaavarput. Soorlu maanna iliuuseqassaagut imaluunniit nakorsiartoq napparsimmavimmut unitsinneqassava, nakorsaq Ivalu Spange Frederiksen KNR-imut taama oqarpoq.
Aamma atuaruk Qaratsamik aanaartoortut amerliartussangatippaat
Inooriaatsimik allannguineq apeqqutaasarpoq
Uummatikkut nappaatit kingornuttagaapput, pujortartartuunerli uummatikkut ajornartorsiutinut qaninnerulersitsisarpoq, aamma inooriaatsimik allannguineq uummatikkut ajornartorsiortinik pilersitsisinnaavoq.
- Nerisartakkavut allanngorsimapput, timersorpallaanngilagut biilernerullutalu. Tamanna soorunami annertuumik sunniuteqarpoq, Nuummi Dronning Ingridip Napparsimmavissuani nakorsaq Nick Duelund taama oqarpoq.
Uummatikkut ajornartorsiutit assigiinngitsorpassuit ullut tamaasa naammattoortarpai.
- Uummatip taqaasigut milikartoornerit uummamminnillu tilleruloortoortut takunerusarpagut, imaluunniit uummatip nukillaariartornera - tassami uummat nukiugami tillerneralu nukilaanneruleriartorsinnaalluni.
- Kingullertigut takussaaleriartuinnartut tassaapput inuusuttut 30-40-t missaannik ukiullit uummatip taqaasigut milikartoortartut. Tamannalu nappaatip ilaqutariit iluanni kingornuttagaaneranik peqquteqarnerpaavoq. Aamma pujortartartuuneq tamatumunnga sunniuteqartupilussuuvoq.
Uummallunneq pillugu isumasioqatigiinneq Kalaallit Nunaanni nakorsat peqatigiiffiat suleqatigalugu ingerlanneqarpoq.