Qaratsamik aanaartoortut amerliartussangatippaat
Qaratsakkut aanaartoornerit nunatsinni pisartut nunanut allanut sanilliullugit ikinnerumaarsimagaluarput. Taamaattuaannarnissaali ilimananngilaq. Naalakkersuisut ilimagaat inooriaatsip allanngornera aammalu inuuneqqortusineq ilaatigut pissutigalugit qaratsakkut aanaartoortartut amerliartorumaartut.
Siumut sinnerlugu Inatsisartunut ilaasortaq Malik Berthelsen paragraf 37 tunngavigalugu Naalakkersuisunut apeqquteqarpoq nappaat innarluuteqalissutaasartoq pillugu. Aanaartornerup kingorna timip ilaa nukillaarsinnaasarpoq aammalu oqalunniarneq ajornakusoortinneqalersarluni.
Ukiuni makkuni qaratsakkut aanaartoortut nunatsinni ukiumut 107-it missaanniittarput, eqqaaneqareersutullu ukiuni aggersuni suli amerlanerulernissaat ilimagineqarpoq.
- Pujortartarneq qaratsamik aanaartoornermik kinguneqartitsilluarsinnaasut ilagaat, aammali imigassamik atornerluineq aanaartoornermik kinguneqartitsisinnaavoq, peqqissutsimut naalakkersuisoq Agathe Fontain Malik Berthelsenimut akissummini taama allappoq.
Inuup nammineq qanoq iliuuseqarusussusaa apeqqutaasorujussuuvoq qaratsakkut aanaartornissap pitsaaliorneqarnerani. Inooriaatsimik peqquteqartumik peqqiilliulersarnerit pisarput timi aalatippallaartarsimanngikkaanni aamma nerisat mianersuussimanngikkaanni. Taamaannat Inuunerissarfiit pilersiortorneqarput inooriaatsip kinguneranik nappaatit akiorniarlugit.
Agathe Fontain aamma ilisimatitsivoq Naalakkersuisut ukiamut iliuuseqalersaartut kommunet suleqatigalugit pitsaaliuineq aamma nappaammit tassannga eqqorneqartut peqqissartarnerat pitsanngorsarniarlugu.