Nakorsaaneq: Nunatta tamarmi matuneqarnissaa pinaveersaartissavarput
Nunatsinnut isaasut ulluni tallimani aninaveersaaqqusaaqqilersinnaapput. Immaqa nunat allat assigalugit anersaartuutinut illersuummik atuisalissaagut. Katerinnissamullu inerteqqutit coronaluunniit pillugu malittarisassat qanoq sivisutigisumik atuutissanersut arlaannilluunniit ilisimaneqanngilaq.
Nakorsaaneq peqqissutsimullu naalakkersuisoq tallimanngornermi ualikkut taama oqarput.
Katersuunnissamut malittarisassat
Inuit amerlanerpaamik 100-it januarip ulluisa 31-ata tungaanut illup iluani katersuussinnaapput.
Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
Henrik L. Hansenip Anna Wangenheimillu (D) nunatsinni corona pillugu periusissiaq nalilersoqqitaq saqqummiuppaat.
AAMMA ATUARUK Nakorsaaneq: Corona pillugu malittarisassat 2021-mi atuukkallassapput
Nunatsinni tunillatsissimasoqanngilaq. Ataasiinnarlu tunillatsissimasoq Nanortalimmi aasaq manna paasineqarpoq. Taamaakkaluartorli corona pillugu malittarisassat qaqugu tungaanut atuunnissaat ullulerneqanngillat.
- Ajornanngippat coronamut attuumassuteqartumik toqusoqannginnissaa anguniagaraarput, nakorsaaneq, Henrik L. Hansen oqarpoq.
- Inuiaqatigiit ingerlaannarnissaat aamma meeqqat inuusuttullu atuartarnissaat attatiinnarusupparput. Inuiaqatigiit matunerat inuiaqatigiinnut akisoorujussuuvoq. Illoqarfimmik Nuummitulli matusisariaqalissanngilagut.
Kiisalu 117-issaaniugunarpoq uteqqippaa, pinaveersaartitsiniarnermi qanoq iliussanersugut:
- Qanillinaveersaarneq
- Eqqiluisaarneq
- Napparsimanermi angerlarsimaannarneq
- Covid-19-imut ersiuteqarnermi misissortinneq
- Oqartussaasunit innersuussisoqarpat anersaartuutinut illersuutinik atuineq
Maannakkutut itsillugu timmisartumik nunatsinnukartut kisimik anersaaruutinut illersuuteqartussaapput. Kisianni:
- Anersaartuutinut illersuuteqartoqarnissaanut piumasaqaateqartoqalissappat, piareersimasoqassaq, naalakkersuisoq, Anna Wangenheim oqarpoq.
AAMMA ATUARUK Kina susinnaatitaava? Corona pillugu malittarisassanut ilitsersuut aana
Qanoq sivisutigisumik taama ingerlasoqassava?
Tamanna kialuunniit akisinnaanngilaa. Nakorsaanerup oqarnera naapertorlugu periusissiaq 2021-p ingerlangaatsiarnerata tungaanut atuussinnaavoq – kisianni 2021-mi qanoq sivisutigisumik nalilerusunngilaa.
- Naalakkersuisunut innersuussutigut allanngorsinnaapput, periusissiaq taamaalilluni allanngorsinnaavoq. Suut tamarmik qanoq sivisutigisumik atuutissanersut oqallisiginissaa isumassaqanngilaq. Pissutsit sivisunissaat akueriniartariaqarparput, nakorsaaneq, Henrik L. Hansen oqarpoq.
Iluatit ajoqutaasullu
Nakorsaanerup oqarnera naapertorlugu nunarput iiluatsitsisimavoq. Timmisartumut ilaasut tamarmik ullumikkut nakkutigineqartarput, tassa Kangerlussuarmut timmisartorsuarmik ilaasussat tamarmik coronamik tunillatsissimannginnermut uppernarsaateqaqqaassapput.
Illoqarfik tamarmi piaartumik mattunneqarsinnaavoq, illoqarfiillu akornanni pingaartumik timmisartukkut ingerlaffiusuni angallanneq naleqqussarneqarsinnaalluni.
Ajoquteqarsinnaavorli: Coronamimmi tunillatsittut peqqissaavinnit ungasinnerusunut siammassagunik tamanna ajungaatsiarsinnaavoq.
AAMMA ATUARUK Isornartorsiuisoqangaatsiarnerani: Corona pillugu malittarisassanut ilitsersuusiortoqalersoq
- Nunaqarfinniikkuni tunillatsittoqarsimanerata paasinissaanut iliuuseqarnissatsinnullu piffissartungaatsiartoqarsinnaavoq. Amerlanerutigut kingusinaangaatsiarsinnaassaagut, assartuinermini ajornartorsiuteqangaatsiarpoq, Henrik L. Hansen oqarpoq.
- Marsimi apriilimilu Nuummi tunillaassuuttoqarpoq. Tunillaassuuttoqarnerali ungasikkuni suna tamarmi ajornakusoortorujussuussaaq. Ineqarnermummi pissutsit aamma apeqqutaapput: Nuummi inimi ataatsimi inuit 1,1-it najugaqarput, taamaammat inissaqarluarpoq. Sumiiffinni allani inissiani najugaqartut amerlanerungaatsiartarput. Sumiiffinni taamaattuni inissaqarpallaanngitsuni tunillaassuuttoqarpat tamanna sukkasuumik tunillaassuuttoqarneranik kinguneqassaaq, nakorsaaneq oqarpoq.
Nunatsinni coronamik tunillatsissimasutut uppernarsarneqarsimasut 14-iupput. Taakkunannga napparsimmavimmut unissimasoqanngilaq, tamarmillu peqqisseqqinnikuullutik.
