Isornartorsiuisoqangaatsiarnerani: Corona pillugu malittarisassanut ilitsersuusiortoqalersoq
Peqatigiiffiit kattuffiillu corona pillugu malittarisassanik paasiuminaatsitaminnik akissutersiniarlutik naalakkersuisut matuisa saanni siuleriiaallutik utaqqisimapput.
Kalaallit Arsaattartut Kattuffiat, KAK nunatsinni pissartanngorniuuttoqarnissaanut sukataaruteqarsimasunut ilaavoq, itigartinneqarlunili.
Kalaallit timersortartut kattuffiat, kulturikkut illorsuit, nipilersortartut, atuakkiortut peqatigiiffiat, Sulisitsisut, SIK aamma isornartorsiuipput. Taakku tamarmik corona pillugu malittarisassat malillugit kommunit killeqarfii qaangerlugit aaqqissuussinernut peqataajartortoqaqqusaanngitsoq allat peqataajartorsinnaatitaanerat paasiuminaatsippaat.
Politikerimmi aaqqississuussinernut peqataajartorlutik kommunimit kommunimut allamut angalasinnaapput. Peqatigiiffiillu kattuffiillu taamaalioqqusaanatik.
AAMMA ATUARUK Ataatsimeereernermi: Kattuffiit peqatigiiffiillu suli paatsuungasut
Naalakkersuisullu soqutigisaqaqatigiinnut suliffeqarfinnullu paatsuungasunut sapaatip akunnerani matumani ikiuuteqarniarput.
- Nalunaarutinut ilitsersuusiorneq nalinginnaasuungikkaluarpoq, maannali pisariaqartinneqarpoq, peqqissutsimut naalakkersuisoqarfiup pisortaa, Tine Pars oqarpoq.
Taassuma nalunaarutip oqaasertaasa, kattuffiit peqatigiiffiillu paatsuungassutigisaasa, assigiinngitsorpassuarnillu paasineqarsinnaasut paasiuminarnerulernissaanut ilitsersuut ataasinngornermi saqqummiusseqataaffigaa.
- Nalunaarutinut nalinginnaasumik ilitsersuusiortoqarneq ajorpoq, maannali pisariaqartinneqartoq takusinnaavarput, Tine Pars KNR-imut oqarpoq.
Naalakkersuisoqarfiup pisortaata oqarnera naapertorlugu ilitsersuut sapaatip-akunnerani matumani saqqummiunneqassaaq.
Attaveqatigiinnerup pitsaanerulernissaa ukkatarineqartoq
Taamaammat ilitsersuutigineqartussami paragraffit ilaasa, eqqarsarnermik qularnermillu pilersitsisut, nassuiaatigineqarnerat atuarneqarsinnaassapput.
Katersuunnissamut malittarisassat
Inuit amerlanerpaamik 100-it januarip ulluisa 31-ata tungaanut illup iluani katersuussinnaapput.
Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
Tusarfik: Naalakkersuisut.
Paragraf 1 nalunaarummi paatsuungatitsinerpaagunarpoq:
Tassani allassimavoq: 2 aamma 4 katersuunnernut naalakkersuisuinikkut allatulluunniit isummersornissamik siunertalinnut atuutinngillat”.
Qanorli ”isummersornissamik siunertaqartut” isumaqarpa”?
Tamanna nalunaarummut ilitsersuutip nutaap akissuteqarfigisinnaavaa.
KNR-ip kattuffiit ilaannit sinniisut ataatsimiinnermut aggersarneqarsimasut ataasinngormat oqaloqatigai.
Maannalu ilitsersuusiortoqalernissaa ilorrisimaarutigineqarpoq.
Aammattaaq Peqqinnissamut Naalakkersuisuisoqarfiup avammut attaveqartarnermut pitsaanerulersitsinissamut nukissanik atuiniarluni pilersaarutigaa.
- Siullermik ilitsersuutip sapaatip akunnerani matumani saqqummersitsiniarpugut. Taava Namminersorlutik Oqartussanit ataatsimut attaveqatigiinnitsinnut qanoq pitsaanerulersitsisinnaanerluta pilersaarusiussaagut. Pingaartumik nalunaarummut atatillugu, Tine Par oqarpoq.
