Ataatsimeereernermi: Kattuffiit peqatigiiffiillu suli paatsuungasut
KNR-p sapaatit akunnerini kingullerni taakkua naammagisimaarinninngitsut oqaluttuarai.
Namminersorlutik Oqartussat killilersuinerit pillugit nalunaarutaata oqaasertaanut paatsuungasoqarpoq. SIK-p siulittaasua ataatsimiinnermi paasisaqarnerulinngilaq neriuuteqarporli.
- Nassuiaammik massakkut kiisami tunineqalerunarpugut. Taanna soorunami pitsaasuuvoq, taava nalunngeqqissaassavarput ersarissumik soqqusaanerluta susinnaannginnerlutaluunniit , Jess G. Berthelsen KNR-imut oqarpoq.
AAMMA ATUARUK Malittarisassat oqallisaaqisut: Namminersorlutik Oqartussat peqatigiiffinnut paasissutissiiniartut
Pakatsissutit ikilinngitsut
Namminersorlutik Oqartussat katersuussinnaaneq pillugu nalunaarutaat isornartorsiorneqaqisoq nassuiaatilersorlugu ilitsersuummik allattoqartoq, peqqissutsimut naalakkersuisoqarfiup pisortaata, Tine Parsip ataatsimiinnermi oqaatigaa.
Inuit amerlanerpaamik 100-it januarip ulluisa 31-ata tungaanut illup iluani katersuussinnaapput.
Silami inuit amerlanerpaamik 250-it katersuussinnaapput.
Kommunimit kommunimut angalaqqusaanngilaq. Namminersorlutik Oqartussat katerinnissat pillugit killilersuinerugallartunut nalunaarutaanni paragraf 2-mi allassimavoq:
"Aaqqissuussanut nalliuttorsiornernullu peqataanissamut nalunaarfigineqartariaqartunut atatillugu inuit kommuninit allaneersut aaqqissuussamut peqataanissamut nalunaarsinnaannginnissaat aaqqissuussisup qulakkiissavaa."
Sulisitsisut Namminersorlutik Oqartussat nalunaarutaannik paasiuminaatitsillutik ataatsimiinnermi naalakkersuisoqarfimmiit najuuttunut apeqquteqarput, nalornisigisaminnilli silatuneruleratik.
- Pakatsissutikka ataatsimiinnermi ikilinngillat. Neriuutingali unaavoq ilitsersuusiaq saqqummertussaq nalornisannut akissutissarsiffigisinnaallugu, attaveqatigiinnerlu pitsaanerulissasoq, Sulisitsisut allattoqarfianni pisortaq, Karsten Lyberth Klausen oqarpoq.
Assi: Poul Petersen. KNR / Andreas Wille
Timersortartut paasinninnerupput
Timersoqatigiit Kattuffianni pilersaarusiornermut siunnersortip, Poul Petersenip nalunaarut ataatsimiinnerup kingorna paasinerulerpaa ajunnginnerusinnaaasoraali.
- Ersarinnerupput suli ersarinnerusinnaapput aamma nammineerlutik oqaatigivaat nalunaarut suli misissortariaqassasoq, Timersoqatigiit Kattuffianni pilersaarusiornermut siunnersorti, Poul Petersen oqarpoq.
