Nakorsaaneq: Corona pillugu malittarisassat 2021-mi atuukkallassapput
Allarpassuit qanillugit tusarnaartitsisuniinnissarput qilanaarilereersimagutsigu taama maanna pakatsinissamut aarlerinartoqarpoq.
Coronami pillugu malittarisassiarineqartut maanna 2021-mi sivisunerusumik atuuttussaarpasipput.
Nakorsaaneq Naalakkersuisut siulittaasuata Naalakkersuisoqarfiani tusagassiortunik ataasinngornermi ualikkut katersortitsinermi oqarpoq.
AAMMA ATUARUK Kim Kielsen politikerit katersuussinnaanerat pillugu: Tunngaviusumik inatsit aallaaviuvoq
- 2021-p ingerlalertornissaanut suliaqarpugut, pissutigalugu taamaattussaanera nalunnginnatsigu. Nunarsuarlu tamakkerlugu qiviariarutsigu tamanna tammariartunngitsoq ersarippoq. Maannakkut ineriartorneratut itsillugu nunarsuaq tamakkerlugu amerliartorpoq, nakorsaaneq coronap ilungersunartorsiortitsinera pillugu oqarpoq.
Nunatsinni tunillatsissimasoqanngilaq. Maannakkutullu itsillugu inuit amerlanerpaamik 100-it illup iluani katersuussinnaapput silamilu amerlanerpaamik 250-iusinnaallutik – tamannalu ”2021-mi sivisunerusumik” atuussinnaavoq.
Bussit biografertarfiillu
Taamaalillutik neriniartarfiit, imerniartarfiit sutorniartarfiillu isersimasinnaasut affaannaanik isertitsisaannarsinnaarataannaapput. Tamanna biografertarfinnut, naluttarfinnut, atuakkanik atorniartarfinnut allanullu sunngimmi neqeroorutaasunut aamma atuuppoq.
Angalanermut killilersuinerit ingerlaannarsinnaapput, bussinilu issiaviit affaannaasa kisimik atorneqarsinnaanerat aamma ingerlaannarsinnaavoq. Nalunaarutillu ilaa kattuffinnit peqatigiiffinnillu qaammammi kingullermi isornartorsiorneqangaatsiartoq: tassa kommunimit kommunimut allamut angalalluni aaqqissuussinernut nalunaaqqaarluni peqataaffigineqartussanut peqataaqqusaannginnermut tunngasoq ilaavoq – taamaallaat politikeriugaanni taamaaliortoqarsinnaavoq.
AAMMA ATUARUK Kielsen coronamut atatillugu isornartorsiorneqarnerminut illersortoq: Issiaannassaanga!
Corona pillugu malittarisassat ilaat nalunaarummut upernaarli allanneqarsimasoq – imaaliallaannartumik atorunnaarsinneqarsinnaanngilaq.
- Iliuusissioqqinnerput pissutsit piffissami sivisunerusumi atuuttussaaneranik paasinninnitsinnik pissuteqarpoq. Aallaqqaataani covid-19 sammileqqaaratsigu tamatuma qanoq sivisutigissanera qularnarsimavoq, nakorsaaneq, Henrik L. Hansen oqarpoq.
Tunillatsissimasut nunarsuaq tamakkerlugu amerliartortut
Danmarkimi tunillatsissimasut amerliartorput. Assersuutigalugu Belgiami, Spaniami nunarsuarmilu sumiiffinni allani aamma amerliartorput. Taamaammat inuit assatik sprittilertaannassavaat ungasillisimaassallutillu aamma corona pillugu malittarisassat suli atuukkallartussaasussatut piareersimaffigissavaat:
- Sulu angorusupparput? Siullertut nunatsinni coronavirusimik toqquteqartut amerlangaatsiannginnissaat angorusupparput. Aamma amerlasuut napparsimalernissaat sivisuumillu ajoqutigiuagaqalernissaat pinaveersaartinniarparput.
- Aamma atuarfeqarfiit inuussutissarsiornerillu matunissaat pinaveersaarniarparput. Nalunngilarpullu matusivilluta aallartikkutta tamanna inuiaqatigiinnut akisoorujussuussaaq. Suna tamarmi unittuussaaq, Henrik L. Hansen oqarpoq.
