- Sulisut ilaat tikinnermi kingorna suliartorsinnaatinneqarput. Taamaallaalli allanut tunillaasinnaanngikkunik. Tikerlaat coronamik misissorneqarnerisa tunillatsissimannginnerannik takutitsinnginneranni pisortat suliffeqarfinniissanngillat ataatsimiigiassanatillu, nakorsaaneq oqarpoq.Assi: KNR

Nakorsaaneq Ilulissani coronamik tunillatsittoqarnera pillugu: Malittarisassat ilaat malinneqanngillat

Tikerlaat coronamik misissorneqarnerminni tunillanneqarsimannginermik takussutissaateqanngikkunik pisortat suliffeqarfinniissanngillat ataatsimiigiassanatillu.

- Malittarisassat ilaat malinneqanngillat.

Ilulissani kommunip allaffiani sulisut qulit angerlartinneqarnerannit sapaatip-akunnera qaangiuttoq, nakorsaaneq ersarissumik taama marlunngornermi nalunaaruteqarpoq.

 Ilulissani coronamik tunillatsissimasup uppernarsarneqarneranit sapaatip-akunnera qaangiuttoq taama nalunaaruteqarpoq. Tunillatsissimasoq Munck Gruppenimi Ilulissani mittarfissamik sanaartuleruttortumi sulisuuvoq.

AAMMA ATUARUK Corona: Tunillatsissimasoq nutaaq Ilulissani paasineqarpoq

Tunillatsissimasoq nunatsinnut maajip ulluisa 19-ianni tikippoq, maajillu ulluisa 25-anni misissorteqqilluni. Tunillatsissimasoq nunatsinnut aallannginnermini misissorneqarami tunillatsissimanngikkaluarpoq ersiuteqaranilu. Taamaakkaluartorli taanna timimini coronaviruseqarsimavoq. Tassami Ilulissani maajip ulluisa 25-anni misissorneqarami coronaviruseqartoq paasineqarpoq.

Tunillaanissamut aarlerinartoq

Tunillatsissimasup ulluni taakkunani Ilulissaniinnerani allanut tunillaasimasinnaanera aarlerigineqarpoq. Tamanna pissutigalugu kommunimi sulisut qulit maajip ulluisa 27-anni angerlartinneqarput.

Borgmesteri, Palle Jerimiassen kommunimilu pisortaaneq, Nick Nielsen angerlartinneqartunut ilaapput.

Taakkumi Munck Gruppenimi sulisut marluk ippassaammagu ataatsimeeqatigisimavaat. Munck Gruppenimeersut marluk coronavirusimik tunillatsissimanersut uppernarsarneqarsimanngilaq – taamaakkaluartorli ataatsimiinnermi peqataasimasut angerlaqquneqarput.

AAMMA ATUARUK Corona kommunimi aarlerigineqartariaqanngitsoq: Borgmesteri suliartoqqittoq

Angerlartinneqarnermili aqaguani Coronalerisoqatigiinnit suliartorsinnaalerseqqinneqarput.

- Ilulissani ataatsimiinnerit ilaat apeqquserneqarsimasut tusagassiuutini saqqummerput. Malittarisassanik malinninngittoqarsimaneranik pisoqarpoq, nakorsaaneq, Henrik L. Hansen oqarpoq.

- Sulisut ilaat tikinnermi kingorna suliartorsinnaatinneqarput. Taamaallaalli allanut tunillaasinnaanngikkunik. Tikerlaat coronamik misissorneqarnerisa tunillatsissimannginnerannik takutitsinnginneranni pisortat suliffeqarfinniissanngillat ataatsimiigiassanatillu, nakorsaaneq oqarpoq.

Munck Gruppenip tunillatsittoqarnera oqaaseqarfigerusunnagu siusinnerusukkut oqaatigaa, tunillatsissimasoqarneralu inunnut ataasiakkaanut tunngasuunerarlugu.

 

Nunatsinnut tikittut mattusimanissaannut misissortinnissaannullu malittarisassat imaapput:

  • Nunatsinnut aallannginnermi kingusinnerpaamik ullut tallimat sioqqullugit coronavirusimut misilitsinnikkut uppernarsakkamik tunillatsissimassanngilatit.
  • Nunatsinnut tikikkuit ingerlaannaq angerlarsimaannaqqusaaneq atuutilissaaq.
  • Angerlarsimaannaqqusaaneq Nunatsinnut tikittumut kisimi atuutissaaq. Angerlarsimaannaqqusaaneq inoqutigiit sinnerinut atuutinngilaq, qanippallaarlutik attornaveersaarunik eqqiluisaarluarnissarlu eqqumaffigineqarpat.
  • Nunatsinnut tikinnermi ullut tallimassaanni misissorteqqissaatit. Taamaaliussaatit najukkanni peqqinnissaqarfimmut inniminniinikkut. Tunillanneqarsimanngilatit – angerlarsimaannarnerit atorunnaassaaq. Tunillatsissimaguit – angerlasimaffinni mattusimanivit aallartinnissaa pillugu nunatta nakorsaaneqarfianit attavigineqassaatit.
  • Tunillatsissimaguit inoqutitit aamma angerlarsimaannaqquneqassapput.
  • Angerlarsimaffinni mattusimaneqarnerpit nalaani ilaatigut inoqutigiit najugaqatigisatit naapinnaveersaassavatit, nammineq ineqassallutit ajornanngippallu nammineq perusuersarfeqarlutillu uffarfeqassaatit.  Kingulleq pisinnaanngippat tunillatsissimasoq taaneqartunik atuisimagaangami nammineerluni eqqiaasassaaq.

Isummersuutit