- Toqqissiallaqaanga. Nappaammik siaruaatsitseqataasimasinnaanissarput ernumassutigigaluarpara. Maanna nuannaaqaanga, borgmesteri oqarpoq.Assi: KNR

Corona kommunimi aarlerigineqartariaqanngitsoq: Borgmesteri suliartoqqittoq

Ilulissani kommunip allaffiani sulisut qulit suliffimminit ippassaq angerlartinneqarput.

Avannaata Kommuniani sulisut qulit coronamik tunillatsittoqarsimasinnaanerata aarlerinarnera pissutigalugu ippassaq angerlartinneqarput.

Borgmesteri, Palle Jeremiassen angerlartinneqartut qulit ilagaat.

Angerlartitsisoqarnerali sivikitsuinnaavoq. Palle Jeremiassen Ilulissani borgmesterip allaffianut ullumi uteqqereerpoq.

- Tassa qujanartumik angerlarsimanissarput tunngavissaqanngitsoq aatsaaqqinnaaq paasitinneqarpugut, Palle Jerimiassen KNR-imut oqarpoq.

Ilulissani coronamik tunillatsissimasoqartoq ippassaq saqqummiunneqarpoq. Tunillatsissimasoq Munck Gruppenimi mittarfissamik nutaamik sanaartoqataasuuvoq.

Eqqissiallangaatsiartoq

Munck Gruppenimit inuit marluk Palle Jerimiassen kommunimilu sulisut allat qulingiluat ilaatigut kommunimi pisortaaneq Nick Nielsen, attaveqatigiinnermut pisortaq Katé Hansen teknikkeqarnermullu immikkoortortaqarfimmi sulisut arfineq-marluk ataatsimeeqatigaat.

Sulisut taakku marluk coronaviruseqartutut uppernarsarneqarsimanngillat. Taamaakkaluartorli ataatsimiinnermi peqataasimasut angerlaqquneqarput.

- Pisortaqarfinni coronalerisoqatigiinnit nalunaarfigineqarnissatta tungaanut angerlarsimaqquneqarpugut. Maannali suliartoqqissinnaasugut paasitinneqarpugut, Palle Jerimiassen oqarpoq.

AAMMA ATUARUK Borgmesteri inuillu qulingiluat allat coronamik tunillanneqartoqarmat angerlaqqusaasut

- Toqqissiallaqaanga. Nappaammik siaruaatsitseqataasimasinnaanissarput ernumassutigigaluarpara. Maanna nuannaaqaanga, borgmesteri oqarpoq.

- Kisianni ilaquttakkalu misissortinnissannut sunnerfeqarniarpunga. Misissortinnissarput pisariaqanngikkaluarpoq, taamaakkaluartorli misissortinniarpunga.

Aasianni aamma tunillatsissimasoqartoq

Illoqarfimmi tunillatsissimasumik nutaamik paasisaqartoqarnera pissutigalugu Ilulissani utoqqaat illuannut pulaartoqaqqusaajunnaarnissaa Avannaata Kommuniata aalajangerpaa. Naalli kommunip allaffeqarfiani coronap ernummatigineqarnera atuukkunnaartinneqaraluartoq pulaartoqaqqusaannginnera atuutiinnassasoq, Palle Jerimiassenip paasissutissiissutigaa.

Nunatsinni coronamik tunillatsissimasoqarani sapaatit-akunneri aqqanillit ingerlapput. Inulli ataaseq Aasianniittoq tunillatsissimasoq sapaatiummat uppernarsarneqarpoq.

AAMMA ATUARUK Corona: Tunillatsissimasoq nutaaq Ilulissani paasineqarpoq

Tunillatsissimasoq taanna Danmarkimiissimavoq, covid-19-imillu tunillatseqqasimalluni. Taanna nunatsinnut sapaatip-akunnerata siuliani sisamanngornermi aallannginnermini misissortikkami tunillatsissimanngitsutut uppernarsarneqarpoq – nunatsinnulli tikereerluni misissorteqqikkami coronamik tunillatsissimasutut uppernarsarneqarluni.

Tunillatsissimasoq taassumalu ilaqutai angerlarsimaffimminni mattuteqqapput, nakorsaanerullu oqarnera naapertorlugu tunillaasimasinnaanera ilimananngitsutut nalilerneqarpoq.

KNR-ip nakorsaaneq oqaaseqartinniarsaraa.

Isummersuutit