Borgmesteri inuillu qulingiluat allat coronamik tunillanneqartoqarmat angerlaqqusaasut
Ilulissani mittarfiliorlutik sulisut ilaata, suliffeqarfimmi Munch-gruppenimeersup, coronavirusimik tunillatsissimanerata pingasunngornermi paasineqarnerata kingorna Avannaata Kommuniani sulisut qulit angerlartinneqarput. Avannaata Kommunia tusagassiutinut taama nalunaaruteqarpoq.
Kommunimi atorfillit angerlartinneqartunut tassaapput: borgmeteri Palle Jerimiassen, kommunip pisortaa Nick Nielsen, attaveqaqatigiinnermut pisortaq Katé Hansen kiisalu kommunip teknikkimut immikkoortortaqarfiani sulisut arfineq marluk.
Taakkua suliffeqarfimmi Munch-gruppenimi sulisunik marlunnik pingasunngornermi ataatsimeeqateqareernermik kingorna angerlartinneqarput.
Munch-gruppenimeersut marluk kommunimi ataatsimeeqatigineqartut coronamik tunillanneqarsimanngimmata erseqqissaatigineqassaaq, borgmester Palle Jerimiassen tusagassiutinut nalunaarummi oqarpoq.
AAMMA ATUARUK Corona: Tunillatsissimasoq nutaaq Ilulissani paasineqarpoq
Tunillatsissimasoq suliffeqarfimmi Munch-gruppenimi sulisuummat, avannaani nunap immikkoortuani nakorsat qullersaata innersuussinera malillugu sulisut angerlartinneqarallarput.
- Maleruaqquneqartut nalinginnaasut malillugit angerlarsimaffitsinniit suligallartussanngorpugut. Sulisut angerlartinneqartut napparsimmaveqarfimmiit arlaatigut iliuuseqarfigineqarnissartik siunnersorneqarnissartillu utaqqivaat, Palle Jerimiassen oqarpoq
Avannaata Kommuniani borgmesterip KNR-imut oqaluttuaraa, ataatsimiinnermi peqataasut tamarmik ullumi sisamanngornermi aqaguluunniit tallimanngornermi misissortissasut.
Angerlarsimaffimmi ikiorteqarneq killilerneqartoq
Ilulissani tunillatsittoqarsimanera pissutigalugu utoqqaat illuannut pulaartoqarsinnaajunnaarallassasoq, Avannaata Kommunia aalajangerpoq,
Taakkua saniatigut angerlarsimaffimmi ikiortit suliarisartagaanni pisariaqarnerpaaginnaat maannamiit suliarineqalissapput.
- Ilulissani Coronaviruseqartoqalernerani utoqqartagut pingaartumik navianartorsiorsinnaasutullu inissisimasut paarilluartariaqarpagut. Ilulissani innuttaasut kaammattorusuppakka tuniluuttoqannginnissaa anguniarlugu nunatsinni nakorsaanerup innersuussutaanik nalinginnaasunik malinneqqullugit, borgmesteri Palle Jerimiassen oqarpoq.
