Corona: Tunillatsissimasoq nutaaq Ilulissani paasineqarpoq

Tunillatsissimasumik nutaamik siumuisoqarpoq.

Tunillatsissimasoq tamatumuuna Ilulissaniittoq, nakorsaaneq, Henrik L. Hansen tusagassiortunik katersortitsinermi oqarpoq.

- Tunillatsissimasoq nunatsinnut angalannginnermini misissortikkami tunillatsissimanngitsoq uppernarsarneqaraluarpoq, nunatsinnili ullut tikinnerminit ullut tallimat qaangiunneranni misissortittussaanermini misissorneqarami tunillatsissimasoq paasineqarpoq.

Nakorsaanerup oqarnera naapertorlugu tunillatsissimasoq Ilulissani mittarfinnik sanaartornermik suliaqartuneersuuvoq.

- Nunatsinnut tikittartut amerliartuinnartillugit taama pisoqartarnissaa naatsorsuutigisinnaavarput, tunillatsissimasoq angerlarsimaffimmini mattuteqqavoq.

AAMMA ATUARUK Nakorsaaneq coronamik tunillatsinneq nutaaq pillugu: Aasiaat matuneqarnissaa isumassaqanngilaq

- Tunillanneqarsimasinnaasullu paasiniarlugit misissuileruttorpugut, tamannalu politiit suleqatigineratigut tunillatsissimasup attavigisimasai ujartorneqarput, taakkulu angerlarsimaffimmi mattuteqqanissaat qulakkeerneqassalluni, nakorsaaneq oqarpoq.

Naalakkersuisut siulittaasuata, Kim Kielsenip oqarnera naapertorlugu tunillatsissimasutut paasineqartoq nutaaq nunatta ammaqqikkiartornissaanut periusissamut allannguissanngilaq. 

- Angalasut tamarmik nunatsinnukartut tunillatsissimanngitsutut uppernarsarneqarnissami tungaanut angerlarsimaffimminni mattuteqqassapput. Angalasut tamarmik ersiutinik maluginiagaqassapput, nakorsaaneq oqarpoq.

Tunillatsissimasutut paasineqartoq kingulleq nunatsinnut maajip ulluisa 19-ianni tikippoq, taannalu maajip ulluisa 25-anni misissorneqaqqilluni. Tunillatsissimasoq nappaammik ersiuteqanngilaq - taamaattorli tunillatsissimasutut uppernarsarneqarluni.

- Uani pisumi tunillanneqarsimasup angalanermini piffissami tunillaasimanissaa ilimananngitsorujussuuvoq, tunillanneqarsimasutulli paasineqartoq tunillaanissaminut aarlerinartoqarpoq, nakorsaaneq, Henrik L. Hansen tusagassiortunik katersortitsinermi oqarpoq.

Nunatta sineriaani misissugassanik tigusisoqarneranit ullut marluk qaangiunnerani inernerit aatsaat paasineqarsinnaasarput. Taamaammat nakorsaaneqarfiup sineriammi misissuisarnerit utaqqineqarneqartariaqarunnaarnissaannut periarfissat sulissutigai, nakorsaaneq oqarpoq.

Aasiaat

Nunatsinni sapaatini-akunnerni aqqanilinni coronamik tunillatsissimasoqanngereerluni tunillatsissimasumik Aasianni paasisaqartoqarpoq.

AAMMA ATUARUK Coronavirusimik tunillatsissimasumik Aasianni nassaartoqartoq

Tunillatsissimasoq Danmarkimiissimavoq, taannalu Covid-19-imik napparsimasimalluni. Tunillatsissimasoq nunatsinnut aallannginnermini marloriarluni misissorneqarami tunillatsissimanngitsutut uppernarsarneqarpoq – nunatsinnili misissorneqarami tunillatsissimasutut uppernarsarneqaqqilluni.

Coronaviruseqartoq ilaqutaalu angerlarsimaannaqqusaapput, nunattalu nakorsaanera oqarnera naapertorlugu tunillatsissinnaaneq aarlerinartortaqanngingajappoq.