Nakorsaaneq coronamik tunillatsinneq nutaaq pillugu: Aasiaat matuneqarnissaa isumassaqanngilaq
Nunatsinni sapaatini-akunnerni aqqanilinni coronamik tunillatsissimasoqanngereerluni tunillatsissimasumik Aasianni paasisaqartoqarpoq.
Tunillatsissimasoq Danmarkimiissimavoq, taannalu Covid-19-imik napparsimasimalluni. Tunillatsissimasoq nunatsinnut aallannginnermini marloriarluni misissorneqarami tunillatsissimanngitsutut uppernarsarneqarpoq – nunatsinnili misissorneqarami tunillatsissimasutut uppernarsarneqaqqilluni.
Nuuk marsip qaammataani illoqarfiit pingaarnersaanni tunillatsissimasumik paasisaqartoqarnerata kingornatigut matoqqalluinnaraluarpoq. Aasiaalli matuneqarnissaa oqallisigineqarnavianngitsoq, nakorsaaneq, Henrik L. Hansen oqarpoq.
Ammaasoqarnissamut periusissaq:
Immikkoortoq 1 juunip ulluisa 15-ianni aallartissaaq.
Sapaatip akunneranut timmisartumut ilaallutik tikittut amerlanerpaamik 600-sarnissaat ammaanissap kingunerissavaa.
Angalasut misissortinnermi tunillatsissimassanngillat, tikinnerullu kingornagut ullut tallimat qaangiunnerisigut misissortittassallutik. Angalasut tikereernermik kingorna tunillatsissimannginnermut misissorneqarnissartik tikillugu mattusimatinneqassapput.
Tamatuma saniatigut massakkut peqqusinerit innersuussutillu aalajangiusimaannarneqassapput.
Nunatta ammariartornera immikkoortuni pingasuni ingerlanneqassaaq.
- Nuummi tunillatsittoqarsimaneranik nakkutigineqarsinnaanngitsumik paasisaqartoqarneratigut matuneqarpoq. Tunillatsissimasup ataatsip sumi tunillatsissimanera ilisimaneqarsimanngilaq, taamaammat Nuuk matuneqarpoq. Taamaammat Aasiaat matunissaa isumassaqanngilaq. Tunillatsissimasup kikkut ilagisimanerai sumiissimanera nakkutigilluarsinnaavarput, nakorsaaneq oqarpoq.
Tunillatsissimanngitsoq marloriarluni uppernarsarneqartoq
Tunillatsissimasoq ilaquttanilu angerlarsimaffimminni mattuteqqapput.
Tunillatsissimasorli marloriarluni misissorneqarnermini tunillatsissimanngitsutut uppernarsarneqarsimasoq – qanoq ililluni tunillatsissimasutut uppernarsarneqarsinnaalerpa?
- Tamanna naatsorsuutigineqarsinnaavoq – nunarsuatsinni sumiiffinni allani assersuutigalugu Savalimmiuni Korea Kujallermilu aamma taama pisoqarpoq.
AAMMA ATUARUK Ulloq kiisami aalajangerneqarpoq: Nunarput juunip 15-iani ammaqqissaaq
- Napparsimareersimasut timaanni viruseqartutut takutinneqartarnersut virusilluunniit sinneriinnarneraa suli ilisimasaqanngilagut. Nappaat – siusinnerusukkut ilisimaneqanngitsuummat ilisimasat suli naammanngillat.
- Tunillatsissimasup timmisartumi tunillaasimasinnaanera ilimananngilaq. Atortorissaarutit misissuinermut atukkatta virusip aattuutuunersoq sinittuunersorluunniit immikkoortissinnaanngilaat. Atortorissaarutip virusimeersut – sinittuuneranik aattuutuuneranilluunniit immikkoortitsinani misissortarpai.
Tunillatsissimasoq timmisartumi tunillaasimasinnaava?
- Ilimanaateqarpallaanngilaq, nakorsaaneq oqarpoq.
Angalasut Kangerlussuarmi immikkoortinneqassasut
Nakorsaanerup oqarnera naapertorlugu timmisartuutileqatigiiffiit peqatigiiffiata, IATA-p nalunaarusiaq saqqummerseqqammerpaat. Timmisartumi ilaasuni coronavirusimik tunillaasoqarsimaneranut uppernarsaasoqarsimanngitsoq tassani allassimavoq.
- Taamaattoqarsinnaanerali mattunneqarsinnaanngilaq, tamanna piffissap ilaanni pissasoq, nakorsaaneq oqarpoq. Angalasulli tamarmik arlaatigut tunngaviusumik aarlerinaateqarput, nakorsaaneq oqarpoq.
- Danmarkili ammaqqikkiartungaatsialernikuuvoq, tunillatsissimasulli amerlatsingaanngillat. Inuilli ungasillisimaarnissaannut innersuussutit sunniuteqarluarput.
AAMMA ATUARUK Kommune Qeqertalik: Suliaq coronavirusilimmut tunngasoq malinnaavigeqqissaarparput
Nunarput juunip ulluisa 15-ianni ammaqqissaaq. Tassa nunatsinnut angalaniartut Namminersorlutik Oqartussanit akuersissuteqarfigineqaqqaarnatik angalasinnaanngoqqissapput. Taamaammat mittarfittut Kangerlussuartut ittumi nunanit allanit tikittut qanoq ilillutik 2 meterinik imminnut ungasitsigisassappat?
- Assigiinngitsorpassuit ajornakusoortut, nakorsaanerup nassuerutigaa.
Naalakkersuisut siulittaasuata, Kim Kielsenip oqarnera naapertorlugu Kangerlussuarmi angalasut immikkoortittarnissaanut pilersaaruteqarpoq.
- Nunatsinni angalasut Danmarkimiillu Danmarkimullu angalasut immikkoortittarnissaanut periusissiorpugut, siulittaasoq oqarpoq, mittarfimmili taama mikitigisumi qanoq iliortoqarnissaa erseqqissumik oqaatiginagu.
- Nunatta juunip 15-iani ammaqqinnissaa ilisimagalugulu aalajangiusimavarput. Tamanulli tamanna piumasaqaatitaqarpoq – tassa ungasillisimaarnissaq, nakorsaaneq, Henrik L. Hansen oqarpoq.
